Ilimasaarut: Apriilip ulluisa arfernanni qinersinerit marluussapput
Apriilip ulluisa arfernanni, kommunalbeskyrelsimut aamma qinersiviusussami, qinersinissat marloorataannaapput.
Inatsisartunummi immikkut ittumik qinersinissamut siunnersuut Inatsisartunit ullumikkut marlunngornermi oqaluuserineqassaaq. Inatsisartunut qinersinissaq pilersaarutit malillugit aatsaat 2022-mi pisussaagaluarpoq.
Inuit Ataqatigiit, Atassut, Parti Naleraq Demokraatillu siunnersuuteqartuupput, Inatsisartunullu apriilip ulluisa arfernanni qinersisoqassasoq siunnersuutigaat.
AAMMA ATUARUK Siunnersuut takkuteqaaq: Partiit sisamat qinersisitseqqusipput
Ulluliussaq Inatsisartunut qinersinissamik piareersarnermut piffissaliussanut naapertuuttoq, siunnersuutaanni allaqqavoq.
Siunnersuut Inatsisartut ukiukkut ullumimiit ataatsimiilerunik oqaluuserisassaanni pingajuussaaq.
Qineqqusaarnermik kinguneqartussamik qinersinissamut siunnersuut akuerineqassappat, Inatsisartut ulluni qulingiluani ataatsimiinnissaanni oqaluuserisassaat tamarmik unitsinneqassapput.
Partiit qineqqusaarnermut atugassaannik saniatigut 3.750.000 koruuninik nunatta karsianit saniatigullu millionit koruunit qinersinermut atugassanik aningaasaqarnermut inatsimmiit immikkoortissasut, partiit sisamat siunnersuutaanni aamma allaqqavoq.
