Politiit ullormut nalunaarutaat: Qaqortumi aserorterisoqartoq imigassartorsimallunilu Nuummi biilinik ingerlatsisoq

Qaqortumi eqqartuussivimmi igalaat tallimat aserorneqarsimapput.

Politiit aserorterisoqarsimaneranut arfininngornermi ullaakkut nalunaaqutaq qulingiluanut qaleriinnerata missaani kalerrinneqarput.

Suliamut tassunga atatillugu suli pasisaqartoqanngilaq, sulilu misissuisoqarmat tamanna pillugu itinerusumik oqaaseqartoqarsinnaanngikkallartoq, Kalaallit Nunaanni Politiit pigaartuisa pisortaata Malik Olesenip KNR-imut oqaatigaa.

- Aserorterinermik takunnittoqarsimappat politiinut saaffiginninnissaat kaammattuutigaarput, taanna oqarpoq.

Kalaallit Nunaanni Politiit oqarasuaataasa normoraat 70 14 48.

Imigasartorsimallutik biilinik Nuummi ingerlatsisut amerlasuut

Politiit taassuma saniatigut ullup unnuallu kingulliup ingerlanerani ulapissimasut Malik Olesenip oqaluttuaraa.

Pingaartumik Nuummi politiit ulappussimapput, imigassartorsimallutimmi biilinik ingerlatsisut amerlasimapput. Tassami imigassartorsimallutik ingerlatsisut sisamaasimapput, taakkunanngalu pingasut ajutoorsimallutik.

Biilit aqqusinermi Kissarneqqortuunnguap nalaani sapaammut unnuaani nalunaaqutaq marlunut tanneq arfineq-pingasunut aqquserngup sinaanut nakkarsimapput. Nuummi Eqqumiitsulianut Katersugaasivik timersortarfissuarlu Inussivik ilaatigut Kissarneqqortuunnguamiipput.

Biilit kingorna ingerlariaqqissinnaasimanngillat.

Biilit allat ullaassakkut nalunaaqutaq tallimat qaangilaaraat aamma ajutoorsimapput, ingerlatsisorlu imigassartorsimalluni.

Biilit tamatumuuna aqqusinermi Iggiaanut, umiatsiaaraqarfiup nalaaniittumi, ajutoorsimapput.

- Biilit taakku aamma ingerlariaqqissinnaajunnaarsimapput, aqqusernummi sinaanut aamma nakkarsimammata, Malik Olesen oqarpoq.

Biilit allat sapaammi ullaakkut nalunaaqutaq arfineq-marluk qaangilaaraat aamma ajutoorput. Biilit Kissarneqqortuunnguami aamma ajutoorsimapput, ulikarsimallutik.

Biilit pingasut taakku ajutoorneranni inunnik ajoqusertoqarsimanngitsoq nalunaarutigineqarpoq.