Borgmester: Akileraartartut illaruaatigaagut
Jens-Frederik Nielsenip (D) ikiorsiissutit annikinneruleratarsinnaaneranik oqaaseqarnerata kingorna suliffissarsiortunut ikiorsiissutit pillugit oqallittoqalerpoq.
Avannaata Kommuniani borgmesteri, Lars Erik Gabrielsen (S) oqallinnermut isornartorsiuilluni ilaavoq. Taassuma isornartorsiuinini KNR-imut maanna itisilerpaa. Tamatumuunalu pissutaasut sammillugit. Taassuma oqarnera naapertorlugu inuit suliffissatut neqeroorutigineqartunut qujaannartarnerannut kisimi tunnganngilaq, inuiaqatigiinnili sulinissamut kajuminnissamut pilersitsisoqannginnera.
- Sapaatip akunneranut akunnerit 40-t sulisaraanni akileraannginnermilu 16.000-inik isertitaqarluni taama suut tamarmik akilereeraanni sinnissaqarpallaartoqarneq ajorpoq. Tassa akissarsiassaritinneqartut suliffeqarnissamut soqutiginninngitsitsipput, taanna oqarpoq.
Borgmesterip naalakkersuisut aamma sulinermik inuussutissarsiuteqartut kattuffiat SIK isornartorsiorpai, taassuma minnerpaamik akissarsiat qaffasinnerunissaanik qulakkeerinissamut sumiginnaasorai. Taassuma SIK-p isumaqatigiissutaani akissarsiat “quianaannartumik appasinnerarpai” sulinermiillu suliffissarsiortutut ikiorsiissutinik pissarsinissaq soqutiginarnerusutut oqaatigalugu.
- Inuiaqatigiit kukkusumik aaqqissuunneqarput. Politikerit sulinerup akilersinnaanissaa oqaatigaat – kisianni qanoq taama oqartoqarsinnaava? Uannut periarfissaq ataasiinnaavoq: Akissarsiat qaffassavagut, taanna oqarpoq.
Naaggaaraanni ikiorsiissutit peerneqassasut
Lars Erik Gabrielsenip aaqqissuussaanerup qanoq ilusilersugaanera pakatsinarnera isertuutinngilaa. Taassuma kommunit innuttaasup peqqissup suliffimmut neqeroorutaasumut itigartitsineratigut ikiorsiissutinik atorunnaarsitsisinnaanngornissaa kissaatigaa.
Kommunimmi ikiorsiissutinik piffissap ilaani taamaallaat affaannanngortitsisinnaapput – tassa mattussinermik aaqqiissuteqarneq.
- Kommunip isumaani inatsisip sulinissamut piareersimassasut oqaatigaa. Taamaammat peqqikkaanni naaggaarsinnaatitaasoqanngilaq. Namminersorlutik Oqartussalli naaggaarsinnaaneraapput – taamaammat amerlasuut mattunneqartarput, taanna oqarpoq, nangillunilu:
- Avannaata Kommuniani isumaqarpugut suliffimmut naaggaaruit taama ikiorsiissuteqarfigineqassanngilatit. Akileraartartut tamarmik eqqarsaatigikkit. Akileraartartut illaruaatigaagut.
Maannakkutut aaqqissuunneqartillugu suliffissarsiortut ikiorsiissutinik arsaarneqaratik suliffissatut neqeroorutigineqartumut naaggaarsinnaatitaapput. Inatsimmi ikiorsiissutit tamaasa unitsinneqarnissaat periarfissaatinngilaa, taamaallaalli innuttaasoq suliffissamut naaggaarpat ilanngaatsissinnaalluni. Borgmesterillu oqarnera naapertorlugu tamanna allanngortinneqassaaq.
Aaqqissuussineq kajumilersitsinngitsoq
Avannaata Kommuniani suliffissaaleqisut qiviaraanni ukiorpassuarni amerlanerpaaffissaminniipput. Lars Erik Gabrielsenillu oqarnera naapertorlugu tamanna suliffissarsiortunut ikiorsiissutit – ullumikkut atuuttut – suliffissarsiortut namminersorsinnaanerannik akisussaaffeqarnermillu misigisimanissaannik peersisarput.
- Aaqqissuussaanerup inuit namminersortinngilai – taamaalillutillu allanut pituttorsimaannarlutik. Tamanna kukkuneruvoq, tamanna naqqaniit allanngortissavarput, taanna oqarpoq.
Ullumikkut suliffimmut taamaatitsiinnarsinnaaneq suliffissarsiortutullu ikiorsiissuteqarfigineqaannarsinnaaneq taassuma isaani ”kukkunerulluinnarpoq”. Taassumalu suliffeqanngikkaanni narrusinnaatitaasoqassanngissoraa.
- Naggaterpiaani imminut isumagisinnaanermut tunngavoq. Nammineq aningaasarsiussaatit. Suliffik kissaatiginngikkaluaraanniluunnit suliffigisariaqarpoq.
Sulineq inunnut nukittorsaataasoq
Taassuma suliffissarsiortunut ikiorsiissutit siunissami kinguaariinnut kukkusumik takussutissiisoraa. Inatsillu allanngortinneqanngikkuni imaluunniit allatut paasineqanngikkuni suliffissaaleqisut ikiorsiissuteqarfigineqartut amerliartuinnassapput.
- Suliffimmut piumasaq malillugu naaggaarsinnaatitaanermik kaammattuuteqarnerput kukkunerulluinnarpoq. Kinguaariit tulliinut taama oqariartuuteqarnianngilagut. Kukkulluinnartumik takutitsineruvoq, taanna oqarpoq.
Taassuma tamanna inunnut peqqissunut suliffimmik itigartitsisunut tunngasoq erseqqissaatigaa. Suliffeqarnerlu nammineq naleqassusermut pitsanngorsaataasoraa.
- Sulineq kikkunnut tamanut iluaqutaavoq. Sulineq ataatsimoornermullu ilaaneq peqqinnartuuvoq. Tamanna inummut inuiaqatigiinnullu iluaqutaavoq. Akissarsiassalli pingaaruteqarluinnarput. Imminut inuunitsinnullu akisussaaffimmik tigusisariaqarpugut.
