Qaleralittat milliartorpat? Aalisartut taama isumaqanngillat
Avannaani qalerallit milliartorlutillu ikiliartornerannik ukiuni amerlasuunngortuni takussutissaqarpoq.
- Tamanna tulaanneqartartuni, uuttortaasarnitsinni uumassusililerisullu misissuineranni takusinnaavarput, aamma qalerallit milliartortut tunitsiviit nalunaarsugaataanni takusinnaavarput Helle Siegstad Pinngortitaleriffimmi Aalisakkanik Qalerualinnillu Immikkoortoqarfimi pisortaq taama oqarpoq.
Ineriartorneq mumillugu qaleralittarineqartartut annerulissappata, Qeqertarsuup Tunuani, Upernavimmi Uummannamilu aappaagu qaleralittassiissutaasussat maanna qaleralittarineqartartuniit ikinnipilussuusariaqartut, Pinngortitalerifffimmiit naliliipput.
- Assersuutigalugu qaleralittat 40 procentinik ikilisinneqarpata, ukiut arlariik qaangiuppata qalerallit anginerulersimassapput, Helle Siegstad taama naliliivoq.
Qaleralinniarnikinnerunissamilli oqalunneq aalisartunit taakkualu peqatigiiffiannit tupinnanngitsumik isumaqatigineqanngilaq.
Aalisartup Ilulissaneersup Aksel Siegstadip, upernaakkut qaleralinniartartup, qalerallit ikiliartornerannik Pinngortitaleriffimmit oqarneq isumaqatiginngilluinnarpaa.
Aksel Siegstad upernaarmanna qaleralinniarami qalerallit akerliaanik oqimaallisimasut maluginiarpaa.
- Angissusai kusanarnerusut takkusimaalaaramik upernassaq, taanna oqarpoq nassuiaallunilu 2 kilomiit qummut kusanartunik taaneqartartut.
Pinngortitaleriffik qaleralittat tulaanneqartut milliartornerannik takussutissaqarneraappat, tamanna tunitsiviit tulaassukkanik minnerpaaffissaliinermut piumasaqaatiminnik allannguisimanerannik pissuteqarsinnaasoq, Aksel Siegstad isumaqarpoq.
- Tunisassiorfiit ikalinerini grammeq 1 kilominngaanniit qassit grammiarannguamut tunisaalernikuupput. Misissortagaannut taakku ilaasimassapput soorunami. Taakku aallaaviusutut taasinnaavakka Pinngortitaleriffiup milliartorneragaaneranut tunngatillugu.
SQAPK: Angisuunik qaleraleqarpoq
Aamma sinerissap qanittuani aalisartut piniartullu kattuffiat, SQAPK, Pinngortitaleriffiup misissuinerisa inernerinut isumakulunngilaq.
Siulittaasup Anthon LIndenhannip kangerlunni allani Pinngortitaleriffiup misissuiffigisimanngisaani angisuunik qaleraleqartoq tikkuarpaa.
Taamaattumik Pinngortitaleriffiup misissuiffigisartakkani annertusisariaqarai, taanna isumaqarpoq.
- Annertunerusumik misissuisoqartariaqarpoq Pinngortitaleriffimmiit. Målertariaqarpaat piffiit ilaanni aamma qalerallit angisuut takkuttartut. Pigaanni piffiit ilaanni mikinerit takkuttartut. Nalilersuinermullu tamakku ilaatinneqarneq ajortut. Soorlu kangerluk eqqaatsiarpara angisoorujussuarnik qaleralippassualik kangerluk imminut paarisoq. Aasakkut annerusumik aalisarfigineqarsinnaanngitsoq, annertunerpaamik ukiukkut issileraangat tikinneqarsinnaasartoq. tanna oqarpoq.
Pinngortitaleriffiup isummernini aalajangiusimavaa
KNR-ip Aksel Siegstadip Anthon Lindenhannillu oqaaseqaataat Pinngortitaleriffimmut ingerlateqqippai.
Qaleralinniarfiusartut tamakkerlugit Pinngortitaleriffimmit misissuiffigineqartut, Pinngortitaleriffimmi Aalisakkanik Qalerualinnillu Immikkoortoqarfimi pisortap, Helle Siegstadip, erseqqissarpaa.
SQAPK-ip siulittaasua kangerlunni angisuunik qaleraleqarneraammaat Helle Siegstadip ilumoornerarpaa.
- Assersuutigalugu Ilulissat kangerluanni ukiukkut aamma qaleralinniartoqartarpoq. Angallatigullu atorlugit tamanna tikissinnaanngilarput. Tunisigaangatali paasissutissarrsisarpugut, Helle Siegstad oqarpoq.
- Angisuunik qaleraleqartoq nalunngilarput, taamaannerali tamakkiisumik takussutissiinngilaq. Qeqertarsuup tunuani tamaat qqiviaraaanni mikisunik amerlasuunik maanna qaleraleqarpoq.
Tunitsiviit siusinnerusumut saniliullugu mikinerusunik tunitsivigineqartalernerat qalerallit millisimanerannut pissutaanngitsoq Helle Siegstad isumaqarpoq.
- Aalisartunit uagullu misissuinitsinnit paasissutissaateqarpugut, takusagullu assigiipput. Qaleralittat anginerulersimanerannik suli takusaqanngilagut, Helle Siestad oqarpoq.
Avannaani aalisartut qaleralinniarnermi nammineerlutik ajornartorsiuteqannginnerarlutik oqarnerat qanoq isumaqarfigaajuk?
- Qalerallit anginerulerssimattillugit aalisaraanni pissarsissutaanerussasut nassuiaanniartarpagut. Oqummersat ikinnerusut atorneqartussaammata ikinnerusullu tulaanneqartarlutik torrallaanerussaaq, Helle Siegstad akilluni aallartippoq.
Avannaani sinerissap qanittuani qaleralittarineqartartut ikiliartornerat mikineruleriartornerallu, Helle Siegstadip nangilluni erseqqissaatigaa.
- Tamanna takusinnaavarput. Tunitsivinniit uagullu nammineq misissuinitsinnit paasissutissaateqarpugut. Tamarmillu assigiimmik ersersitsipput.
Qaleralittassiissutit ikinnerulissappat?
Naalakkersuisut piniagassanik assigiinngitsunik pisassiigaangamik Pinngortitaleriffiup innersuussutai ilaatigut tunngavisarpaat.
Avannaanili sinerissap qanittuani qaleralittassat pineqaraangata, politiikerit Pinngortitaleriffiup innersuussutaanit amerlanerujussuarnik aalisagartassiisarnerat maannamut ileqquuvoq.
Uumassusilerisut pisassatut innersuussutaat ukioq manna aalajangiinissami qanoq tusaaneqartigissanersut suli paasinarsinngilaq.
Sinerissap qanittuani aappaagu qaleralittassat kingusinnerpaamik novemberimi aalajangiiffigineqarumaartut, Aalisaarnermut Naalakkersuisoqarfik KNR-imut akissuteqarluni aallappoq.
Sinerissap qanittuani qaleralinniarnermi aqutsinissamut pilersaarut SQAPK-p aamma Pinngortitaleriffiup akuuffigisaanik 2022-mili suliarigitsik, tassanngaanniit aamma allapput.
- Suliami tassani sinerissap qanittuani qaleralinniarnermi ilisimatuussutsikkut siunnersuinerit aalisagartassiissutinillu aalajangiinerit ilaatigut pineqarput. Aqutsinissamik pilersaarutip ukiap ingerlanerani tusarniaassutigineqarnissaa aappaagulu 2025-mi jannuaarip aallaqqaataani atuutilernisssaa naatsorsuutigineqarpoq, naalakkersuisoqarfik KNR-mut taama allappoq
Qaleralittassiissutigineqartussat ukiup siulianut sanilliullugit ikinnerussanersut akineqanngilaq.
