Naalakkersuisut qaleralittassiissutigerusutaat siunnersuinermit 70 procentimik oqimaannerusut
Uumasorsiuut, Pinngortitaleriffimmeersut, Upernavimmi, Uummannami Qeqertarsuullu Tunuani sinerissamut qanittumi qaleralittassaattut siunnersuutaat ukiuni kingullerni malinneqaratik Naalakkersuisunit sipporneqangaatsiartuaannarput.
Naalakkersuisut tamaani aappaagumut pisassanik uumasorsiuut innersuussutannik malinninnissat aamma qularnarpoq. Tamanna Naalakkersuisut pisassatut siunnersuutaannik tusarniutaaqqammertumi allaqqavoq. Tassa aappaagu qaleralittassat siorna pisassiissutaasunit oqinnerunatillu oqimaannerunnginnissaat tusarniutaaqqammerpoq.
AAMMA ATUARUK Naalakkersuisunngortoq: Uumassusilerituut aalisartullu siunnersuutigisaat naligiissaarlugit pisassiissuteqartoqassaaq
Uumasorsiuut Pinngortitaleriffimmeersut, Upernavimmi pisassatut siunnersuutaanniit aalisartut 53 procentimik, Uummannami 87 procentimik Qeqertarsuullu Tunuani 74 procentimik tulaassinerussasut Naalakkersuisut siunnerfigaat.
Assersuutigalugu uumasorsiuut Uummannami 5.153 tonsit qaleralittarineqassasut siunnersuutigaat, Naalakkersuisulli tamaani 9.650 tonsimik pisasseerusupput.
Ilisimatusartut qaleralittassatut siunnersuutaat Naalakkersuisullu pisassiissutigerusutaat
Qeqertarsuup Tunua: 5.215 tons, 9.100 tons.
Uummannaq: 5.153 tons, 9.650 tons.
Upernavik 6.070 tons, 9.300 tons.
Tusarfik: Naalakkersuisut.
S: Sippuerusunneq ajunngilaq
Naalakkersuisunut tunuliaqutaaqataasut aappaata, Siumup, aalisarneq pillugu oqaaseqartatuata, Naalakkersuisut siunnerfiat iluarisimaarpaa.
- Ajorinngilarput. Aalisarneq nunatsinnut pingaaruteqartorujussuuvoq aamma piffinni pineqartuni ilaqutariippassuarnut pingaaruteqartorujussuuvoq, Jens Kristian Therkelsen KNR-mut oqarpoq.
Qaleralittassat uumasorsiuut innersuussutaannit oqimaannerusuaannassappata tamaanilu qaleralinniarsinnaanermut akuersissutillit, 1000-t sinnillit ikilinngippata, qalerlinniarneq 2026-mi imminut akilersinnaajunnaassasoq, Aalisarneq pillugu Ataatsimiititaliarsuaq siorna inerniliivoq.
Ataatsimiititaliarsuup naliliinera upperinngikkaa
Siumulli oqaaseqartartuata ataatsimiititaliarsuup, aningaasarsiornermik sulialinnik uumasorsiuunillu ilaatigut ilaasortaaffigineqarsimasup inerniliussaa upperinngilaa.
- Uanga taamannak isumaqanngilanga taama isumaqanngilluinnarpunga, Jens Kristian Therkelsen oqarpoq.
Sustainable Fisheries Greenland, tassa piujuaannartitsilluni aalisarnissamik kissaatilik, Sulisitsisut peqatigiiffiat, Royal Greenlandillu qaleralittassat oqimaappallaartut uumasorsiuullu innersuusutaat malinneqartariaqartut tusarniummut akipput.
AAMMA ATUARUK Naalakkersuisoq erseqqissumik suli isumminngitsoq
Qalerualinniat Aalisagarniallu Kattuffiat, aalisartut kattuffiini pingasuusuni tusarniummut akisutuaavoq. Taakkua pisassat oqigaat. Aqutsiveqarfiit Upernavimmiittoq, Uummannamiittoq Qeqertarsuullu Tunuaniittoq tamarmik immikkut 10.000 tonsinik pisassinneqarnissaat taakkua kissaatigaat.
KNR-p Naalakkersuisoqataasut aappaata, IA-p, aalisarnermut oqaaseqartartua, Hans Aronsen, attaveqarfigigaluarpaa, iluatsinngilarli.
