Karl Tobiassen aalisarnermut naalakkersuisunngorpoq.Assi: Ane-Marie Petersen/KNR

Naalakkersuisunngortoq: Uumassusilerituut aalisartullu siunnersuutigisaat naligiissaarlugit pisassiissuteqartoqassaaq

Aalisarnermut naalakkersuisunngortup aalisarneq pillugu inatsisissaq nangissavaa. Taassuma maanna akuersissutaatillit ikilisikkusunngilai.

Aalisarnermut inatsisissaq aalisarnermik soqutigisalinnit assigiinngitsunik isummersorfigineqarluni oqallisaaqaaq. Aalisarnermullumi naalakkersuisunngorlaap suliassaani taanna annerpaavoq.

Inatsisissaq pilersaarutit malilluguit aappaagu piareersimassasoq, taanna KNR-imut oqarpoq.

AAMMA ATUARUK Sinniisumiit Naalakkersuisunngortoq – maanna akisussaaffimmik pingaaruteqarnerpaamiilertoq

Aalisartut maanna akuersissutaatillit inatsisissaq piareerpat ikilisissanngitsut, taanna isumaqarpoq.

- Aalisarnermi inatsisissamik suliaqartitsinermi siunertaanngilaq massakkut akuersissutaatilinnik aalisakkat assigiinngiiartut eqqarsaatigalugit annikillilerinissaq, Karl Tobiassen KNR-mut oqarpoq.

80 procentiisa aalisarneq inuussutiginiarnera ajornakusoortikkaat

Taassuma siuliata, Aqqaluaq B. Egedep, maanna sinerissap qanittuani qaleralinniat tamaasa immikkut pisassikkusunnikuuai. Qeqertarsuup Tunuani, Uummannami Upernavimmilu umiatsiaaqqamik qaleralinniarnissaminnik akuersissutillit inuit 1280-it missaanniipput.

Pinngortitaleriffik sumiiffinni taakkunani qaleralinnik aalisartut tamaasa ukioq manna 14.564 tonsimik qaleralissasut siunnersuuteqarpoq. Naalakkersuisulli 28050 tonsinik pisassiipput.

AAMMA ATUARUK Sinerissap qanittuani aappaagumut qaleralittassiissutit ilaneqassanngitsut

Aalisarnermut ataatsimiititaliarsuaq allappoq, sinerissap qanittuani qaleralinniap ilaquttani napatissinnaassagunigit ukiumut 33 tonsit tulaattariaqarai. Amerlasuulli taamaaliorneq ajorput. Ataatsimiititaliarsuaq naapertorlugu maanna aalisartut 80 procentiinit amerlanerusut taama qaleralittaqartigineq ajorput.

Aalisartut ikilisarnissaannut pilersaaruteqanngitsoq

Aalisarneq pillugu Ataatsimiititaliarsuaq sinerissamut qanittumi umiatsiaaqqamik qaleralinniat ikinnerugunik inuussutigisinnaasaminnik aalisarsinnaanerussasut isumaliutissiissumminni allappoq.

Taamaassappallu aalisartut ikilinerannik kinguneqarsinnaavoq. Tamannalu naalakkersuuisunngortup siunniutinngilaa:

- Tusaasakka tamarmik tassunga killikkusunngillat. Taamaammat uagut akisussaasutut pingaarluinnarpoq atuisut nipaat tusarnaarlugit, Karl Tobiassen oqarpoq.

AAMMA ATUARUK Siumup qalerallit pillugit sangujoraartoqarunnaarnissaa kaammattuutigaa

Sinerissamut qanittumi qaleralinniat amerlassusaat nikigani pisassiissutit uumasorsiuut innersuussutaat malillugit aalajangersarneqartalinngippata sinerissap qanittuani aalisarneq ukiut sisamat qaangiuppata aningaasatigut imminut napatissinnaajunnaassasoq ataatsimiititaliarsuaq allappoq. Naalakkersuisunngorlaalli uumasorsiuut kisiisa tusaarusunngilai.

- Pisassiinissami innersuussuteqarnermi uumasorsiuut aamma atuisut aalajangersaanermi oqimaaqatigiisinnissaat aamma pisussaaffiuvoq.

Naalakkersuisoq isumaliutissiissut Upernavimmut, Uummannamut, Qeqertarsuup Tunuanut Kujataanullu Inatsisartut upernaaq manna ataatsimeereerpata angallatissallugu oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl