Sinerissap qanittuani aappaagumut qaleralittassiissutit ilaneqassanngitsut
Naalakkersuisut sinerissap qanittuani aalisartut aappaagu pisassaat saqqummiuppaat. Tassani qaleralinniat, oqallisaasaqisut pisassaat aamma akuupput.
Qeqertarsuup Tunuani uumasorsiuut innersuussutaat 4.346 tonsiupput, Naalakkersuisulli 9.100 tonsinik, innersuussutit marloriaataat sinnerlugu pisassiipput. Taakkua 47 procentii umiatsiaaqqanit 53 procentiilu angallatersortunit, 6 meterimit takinerusumik angallatilinnit aalisarneqassapput.
Aqutsiveqarfik Uummannami innersuussutit 5.153 tonsiupput, 9.650-lli pisassiissutaallutik. Taakkua 66 procentii umiatsiaaqqanit, 33 procentiilu angallatersortunik qaleralittarineqassapput.
Upernavimmi pisassatut siunnersuutit 5.068 tonsiupput, taamaattoq 9.300 tonsit aalisarneqartussatut aalajangerneqarput. Taakkua 55 procentii umiatsiaaqqat 45 procentiilu angallatit aalisassavaat.
Tassa imaappoq, aqutsiveqarfinni taakkunani nunatsinni qaleralinniaqarnerpaaffiusuni, uumasorsiuut innersuussutaat tamarmik sipporneqangaatsiarput.
Qaammatikkaartumik pisassaaruttut
Aalisarnermut naalakkersuisup, Aqqaluaq B. Egedep, KNR-mut aasaq juunimi neriorsuutigaa,
Pinngortitaleriffiup innersuussutai uniorujussuarlugit pisassiinnginnissartik.
- Innersuussutigineqartut uniorujussuarlugit pisassiinavianngilagut, Aqqaluaq B. Egede aasaq oqarpoq.
Naalakkersuisut pisassat nungoreersut arlaleriarlutik ukiut siuliini ilaqqittarpaat. Tamannali aappaagumit atorunnaassaaq.
- Naalakkersuisut aalajangerput ukiup ingerlanerani pisassiissutinik ilasisoqartassanngitsoq, Naalakkersuisut tusagassiuutinut allapput.
AAMMA ATUARUK Naalakkersuisoq: Qaleralittassatut innersuussutit uniorlugit pisassiinavianngilagut
Qeqertarsuup Tunuani, Uummannami Upernavimmilu umiatsiaararsortut manna tikillugu qaammatikkaartumik paggatassaannik qaleralittassinneqartarput. Tamannali atorunnaarlugu, ukiumut pisassat pagganneqalissapput.
- Pisariaqartitsinerli naapertorlugu, ukiup sinneranut aalisarnissaq qulakkeerumallugu, Naalakkersuisut aggustip aallaqqaataanit ukiup sinneranut qaammammut qaleralittassiisinnaassaaq, Naalakkersuisut allapput.
Ataatsimiitaliarsuaq: Oqilisariaqarput
Aalisarnermut pillugu Ataatsimiititaliarsuaq, sinerissap qanittuani nunap immikkoortuini Qeqertarsuup Tunuani, Uummannami, Upernavimmilu qaleralittassatut innersuussutit malinneqartariaqartut isumaqarpoq.
Ullormiilli ullormut allannguisoqassanngitsoq taakkua ukiaq oqarput, pisassiissutit uumassusilerisut siunnersuutaasa oqimaaqataasa tungaanut, ukiukkaartumik oqiliartuaartinneqassasut taakkua isumaqarput.
AAMMA ATUARUK Aalisarnermut ataatsimiititaliarsuaq: Politikerit pisassiissuteqartarunnaassapput
- Tamanna aalisartut naleqqussarnissaannut piffissaliissaaq. Taamaaliortoqarsinnaanissaa takorloorluarsinnaavarput. Suliniutinilli aallartitsinissamut ukiuni tallimani utaqqisinnaanngilagut, Jens Paulsen oqarpoq
Aalisarnermut Naalakkersuisup Aqqaluaq B. Egedep pisassiinera pillugu apersorusullugu attaveqarfigaarput, taannali sapaatit akunnera tulleq aatsaat piffissaqartoq, naalakkersuisoqarfia paasissutissiivoq.
Naalakkersuisut sinerissap qanittuani qaleralittassiissutaat Pinngortitaleriffiullu innersuussutai:
