- Politikerimmi ingerlatsinissamut ilinniarsimanngillat, taakku politikkikkut aalajangiinissamut maleruagassanillu aalajangersaanissamut pikkoriffeqarput, Jens Paulsen oqarpoq.Assi: Malik Brøns / KNR

Aalisarnermut ataatsimiititaliarsuaq: Politikerit pisassiissuteqartarunnaassapput

Akuersissutinik aqutsisoqarfiup politikerit aalisarnermut ingerlatsivimmit ullormiit ullormut allanngueriataartannginnissaanut qulakkeerutaassaaq. Tamanna Aalisarnermut ataatsimiititaliarsuup ilaatigut innersuussutigaa.

Akuersissutinik aqutsisoqarfimmik aalisarnermut inatsimmik, politikerinik akuleruffiunngitsumik ingerlatsisussamik pilersitsisoqassaaq. Tamanna Aalisarnermut ataatsimiititaliarsuup innersuussutigaa.

Naalakkersuisut aalisakkanik ullumikkut pisassiissuteqartarput, tamannalu sinerissap qanittuani aalisarnermi aningaasaqarnikkut uumassuseqarnerullu tungaatigut ajortoortoqarnissaa ingerlaartitsivoq.

Sinerissap qanittuani qaleralinnik saarullinnillu pisassiissutit uumassusilerisut siunnersuutaannit amerlanerungaatsiartut 2013-imili pisassiissutigineqartarlutillu akuersissutigineqartarput.

Aalisartunut aalisakkanullu qajannaatsuunngilaq, aalisarnermilu politikkimik allanngorartoqarnissaa sivikitsumillu atortussaqaannarnissaa pinaveersaarniarlugu akuersissutinik aqutsisoqarfimmik pilersitsisoqarnissaa, Aalisarnermut ataatsimiititaliap innersuussutigaa.

AAMMA ATUARUK Aalisarnermut ataatsimiititaliarsuup aalisartukinnerunissaa innersuussutigaa: Meeqqatsinnut ernuttatsinnullu naammassapput

Aalisarnermut ataatsimiititaliarsuup siulittaasuata sooq taamaanneranut nassuiaateqarpoq:

- Tamanna politikkikkut sunniiviginnittoqannginnissaanik taaneqartarpoq, naalakkersuisoqarfimmilu aalajangiisoqassagaangat politikkikkut aqutsisunik allatut ajornartumik aalajangiinermut sunniuteqartoqartarnera isertuunneqarsinnaangilaq.

Ingerlatsivimmut suniuteqartarnerat qularnarpoq, tassanili aarlerinartoqarpoq, inatsisinilli ingerlatsiviup politikkikkut suliaqartunit nuutsinneqarneratigut aarlerinartoqarunnaarsitsisoqarsinnaavoq.

- Politikerimmi ingerlatsinissamut ilinniarsimanngillat, taakku politikkikkut aalajangiinissamut maleruagassanillu aalajangersaanissamut pikkoriffeqarput, Jens Paulsen oqarpoq.

Ataatsimiititaliarsuup isumaliutissiissutaa assigiinngitsunik politikerinut innersuussuteqarpoq. Innersuussutillu Naalakkersuisunit Inatsisartunillu malinneqassanersut taakku aalajangissavaat.

Innersuussutit malinnissaannut sapiissseqartoqartariaqartoq

Aalisarnermut ataatsimiititaliarsuaq aalajangiisussaagaluaruni ataatsimiititaliamit innersuussutit malinnissaannut sapiissuseqarneq takutinneqassaaq.

- Pissutsit taamaanneri ilisimallugit iliuuseqarfigalugillu taamaaliortariaqarneq oqaatigalugu sapiissuteqarluinnarmik takutitsinerussaaq. Killormuuanimmi iliuuseqartoqanngikkuni pissutsit pingaartumik sinerissap qanittuani saarullinniarnermi qaleralinniarnermilu ajorluinnartumik inissisimasoqalissaaq, Jens Paulsen oqarpoq.

Sinerissap qanittuani nunap immikkoortuani 47-mi tassa Qeqertarsuup Tunuani, Uummannami, Upernavimmilu qaleralinniarnermut atatillugu innersuussutit erngerumik malinneqartariaqartut Aalisarnermut Ataatsimiititaliarsuaq isumaqarpoq.

Kisianni ullormiit ullormut allannguisoqassanngilaq, piffissalli sivisuup ingerlanerani tassa pisassiissutit uumassusilerisut siunnersuutaasa amerlaqataata tungaanut ukiukkaartumik appariartuaartinneqassallutik.

- Tamanna aalisartut naleqqussarnissaannut piffissaliissaaq. Taamaaliortoqarsinnaanissaa takorloorluarsinnaavarput. Suliniutinilli aallartitsinissamut ukiuni tallimani utaqqisinnaanngilagut, Jens Paulsen oqarpoq, itisiliillunilu:

- Aalajangiisoqanngikkuni arlaatigut pisoqassaaq, pissutigalugu ineriartornermi pissutsit taamaaginnassagunik qanorluunniiit ajortoqassaaq.

Aalisarnermut ataatsimiititaliarsuaq aalisarnermut inatsimmik nutaamik, inuiaqatigiinnut aalisarnerup pitsaanerpaamik iluanaaruteqarfigineqarnissaanut qulakkeerisussamik innersuussuteqartussaq Naalakkersuisunit pilersinneqarnikuuvoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat