Naalakkersuisoq: Qaleralittassatut innersuussutit uniorlugit pisassiinavianngilagut

Qeqertarsuup Tunuani umiatsiaararsortunut qaleralittassiissutit Pinngortitaleriffiup ukioq mannamut innersuussutai 4.346 tonsiupput, Naalakkersuisulli 7.847 tonsinik pisassiipput.

Pisassissutit innersuusutinit 81 procentimik oqimaannerupput.

Taamak sippuineq uumassusilerituut innersuussutaannik uniuinerusoq, maanna aalisarnermut naalakkersuisoq oqarpoq.

- Naalakkersuisut siuliisa pisassiisimanerat uanga toqqammavigisussaavara. 4000 tonsit innersuussutaasimappata 7000 tonsillu aalisarneqarlutik taava uniorneqarsimassapput, aalisarnermut naalakkersuisoq, Aqqaluaq Bilmann Egede KNR-mut oqarpoq.

AAMMA ATUARUK Siumut: Aalisartut amerlanerussapput

Naalakkersuisut pisarnermittut aappaagu pisassiissutissanik ukioq manna ukioq naatinnagu aalajangiissapput.

Pinngortitaleriffiullu innersuussutai uniorujussuarlugit pisassiinnginnissartik aalisanermut naalakkersuisup neriorsuutigaa, qanorpiarli oqimaatsigisumik pisassiinissartik suli naluaa.

- Innersuussutigineqartut uniorujussuarlugit pisassiinavianngilagut, Aqqaluaq B. Egede oqarpoq.

AAMMA ATUARUK Aalisarnermut ataatsimiititaliarsuaq: Aalisagakinnerulinngikkuni pisassakinnerulissapput

Pinngortitaleriffiup sinerissap qanittuani aappaagumut qaleralittassatut innersuussutitik sapaatit akunneri marluk matuma siornatigut saqqummiuppaat, Qeqertarsuullu Tunuani siunnersuutit siornamit allaanerunatik 4.346 tonsiupput.

Naalakkersuisut piujuartitsinermik aallaavilimmik aalisartunut atugassaqartitsiniartut naalakkersuisoq oqarpoq. Taamaattumik sinerissap qanittuani qaleralinniat aalisakkanik allanik aallutaqalersinnaanerat suliassaasoq taanna aamma oqarpoq.

- Piujuartitsissagutta suliassaqarpugut, Qeqertarsuup Tunuani aalisartut amerlavallaarnerat siammaaviginiarsaralugu.

- Tassa imatut paasillugu, qaleralinniarnermi aalisartut aalisariaatsinut sunut nuussinnaavagut, Aqqaluaq B. Egede oqarpoq.