Siumut: Aalisartut amerlanerussapput
Siumup siulittaasuata, Erik Jensenip siulittaasullu tullersortaata Vivian Motzfeldtip Siumup Inatsisartunut qineqqusaarutissaat Ilulissanit saqqummiuppaat.
Partiip pilersaarutaasa kisissaanngitsut ilaattut Siumup nunatta avannaani qaleralittassiissutinik agguaasarneq allanngortinniarpaa.
Naatsumik oqaatigalugu umiatsiaararsortunut ullormikkornit amerlanerusunik pisassiissuteqartoqassaaq.
Tamannali Grønlandsbankenip kingullermik nalunaarutaanut akerliuvoq. Aningaaseriviup umiatsiaararsortunut nutaanut atortitsisarneq 2019-imi unitsippaa. Aalisartut amerlavallaartut aalisakkallu ikillutillu mikivallaartut, aningaaseriviup oqariartuutigaa.
AAMMA ATUARUK Grønlandsbanken: Aalisartut inuunerissaarnissaminnut isertitaqarniarlutik ilungersortut amerligaluttuinnarput
Aalisartullu amerliartuinnartut aningaasaqarnerminnik ataqatigiissitsiniarnertik ajornakusoortikkaat aningaaseriviup aamma maluginiarpaa.
Siumullio siulittaasuata, Erik Jensenip oqarnera naapertorlugu umiatsiaararsortut amerlanerutilernissaannut periarfissaqarpoq. Pisassiissutillu amerlineqaannassasut taassuma oqaatigaa.
Aalisariutit 6 meterimit takinerusut aqutsiveqarfinni nammineq pisassaateqarput, umiatsiaaqqallu 6 meterit ataallugit angissuseqartut paggatassiissutitut aalisartarlutik. Tassanilu aalisartut ataasiakkaat qanoq pisaqarsinnaatiginerat killilerneqarani.
Erik Jensen: Ajalusoornerunngilaq
Qeqertarsuup Tunuani pisassiissutit assersuutigalugu umiatsiaararsortut aalisariutillu akornanni agguaanneqartarput. Qeqertarsuup Tunuani ukioq manna pisassiissutit katillugit 7.847 tonsiupput. Umiatsiaararsortullu tassani katillugit 48,7 procentimik pisassaqartut sinneri aalisariut pissarsiassaraat.
Erik Jensenip oqarnera naapertorlugu aalisariutinut pisassiissutinit umiatsiaararsortunut tunniussisoqarsinnaavoq.
- Pisassiissutigineqartut TAC-imik taaneqartartut tamakkerlugit qallerneqarnissaat aqqutissiuuttariaqarparput. Ullumikkut pisassiissutigineqartut tamarmik qaqinneqarneq ajorput. 6.000 tonsit missaat qaqinneqanngitsoortarput, taannalu nunatta karsianut kommunimullu annertoorujussuarmik naleqarpoq, Erik Jensen oqarpoq.
AAMMA ATUARUK Grønlandsbanken: Sinerissap qanittuani aalisarneq ajutuulerpoq
Grønlandsbankenillu nalunaarutaannut atatillugu Siumut isumaqataanngilaq.
- Soorunami Siumuminngaanniik arajutsisimanngilarput aningaaseriviup oqariartuutaa. Immineq akilersinnaassutsip annertunerpaaffissaanissaa taanna qulakkeerniarlugu suliagut ingerlatissavagut, Siumup siulittaasua oqarpoq.
Imak isumaqanngilasi aalisartut akiliisinnaajunnaartut amerliartuinnarnavianngitsut naak pisassiissutit nikinnatik aalisarnermut akuersissutit amerliartoraluartut?
- Uanga isumaqanngilanga ajutoortoq, oqareernittuut teknikikkut taanna aaqqinneqarsinnaavoq pisassiissutit tamarmik qaqinneqanngitsoortarput. Tamarmik qaqinneqaraluarpata aningaaserivik oqassagaluarpoq immineq akilersinnaasoq.