Grønlandsbanken: Aalisartut inuunerissaarnissaminnut isertitaqarniarlutik ilungersortut amerligaluttuinnarput
Aalisartut amerlavallaarlut aalisakkanik ikippallaartunik milliartortunillu aalisarput.
Aningaaserivik Grønlandsbanken aalisartut aningaasaqarnerminnik ataqatigiissitsiniarnermut ajornakusoortitsisut amerliartuinnartutut misigisaqartoq taama oqariartuuteqarpoq.
AAMMA ATUARUK Grønlandsbanken: Sinerissap qanittuani aalisarneq ajutuulerpoq
- Aalisartunik – aamma aalisartunik nutaanik - aningaasaqarnerminnik ataqatigiissitsiniarnermik ajornakusoortitsisunik qaammatit tamaasa takusaqartarpugut. Aalisarneq uumassuseqarnerup aningaasaqarnerullu tungaatigut attanneqarsinnaasunngortinniarlugu iliuuseqartoqartariaqarpoq, Grønlandsbankenip pisortaa, Martin Kviesgaard aalajangersumik oqarpoq.
Taanna aningaaseriviup inunnut umiatsiaararsorluni aalisartunngorniartunut taarsigassarsititsisarunnaarneranit ukiut marlunngulersut taama nalunaaruteqarpoq. Tamannali ajornartorsiutaasumut aaqqiinngilaq.
- Ajorneruleraluttuinnartutut nalilerparput. Aalisartut aningaasaqarnerminnik ataqatigiissitsiniarnermik ilungersuuteqartut amerliartuinnartut takuagut, pisortaq oqarpoq.
Hunnorujukkuutaat eqqugaasut
Martin Kviesgaardip aalisartut aningaasaqarnikkut ilungersuuteqartut qanoq amerlatigisut erseqqissumik kisitsitaatiginngilaa. Taakkuali hunnorujukkuutaanissaat missiliorpaa.
AAMMA ATUARUK Grønlandsbanken umiatsiaraasortunut aningaasaliisarunnaartoq
Tamanna aningaaseriviup aningaasaqarneranut aarlerinartorsiortitsinngilaq, inuiaqatigiinnulli eqquivoq.
- Aalisartut inuulluarnissaminnut naammattunik isertitaqanngitsut amerlapput, taamaammat nunatsinni innuttaasut ilarujussui matumanik sunnigaaqqapput, tamannalu ilungersunarpoq, Martin Kviesgaard oqarpoq.
Aalisarnermut ataatsimiititaliap innersuussuteqarnissaanut qilanaartoq
Politikerit aalisarnerup attanneqarsinnaanerulernissaanut iliuuseqanngippata, aalisarnerup ilaani aningaasaqarnikkut uumassuseqarnerullu tungaatigut ajortoortoqarnissaa Grønlandsbankenip misissueqqissaarnermini siulittorpaa.
Assi: Martin Kviesgaard Grønlandsbankenimi 2005-imi pisortaalerpoq.
Taamaammat aningaaseriviup aqutsisuisa Aalisarnermut ataatsimiititaliarsuup aalisarnermik ingerlatsinermut upernaamut innersuussuteqarnissaa qilanaaraat.
- Aalisartut amerlassusaannik naleqqussaasoqarnissaanut attanneqarsinnaasumillu ingerlatsinissamut innersuussuteqartoqarnissaa neriuutigaarput. Qanoq aaqqiinnissaa paasiuminaakkunanngilaq. Tassalu attanneqarsinnaasumik ingerlatsineq aalisartullu amerlassusaannik naleqqussaaneq, pisortaq oqarpoq.
AAMMA ATUARUK Coronap ilungersunartorsiortitsinera Grønlandsbankenip siuariartorneranut uniffiliisoq
Martin Kviesgaardilli ullormiit ullormut ajortoortoqarnavianngitsoq erseqqissaatigaa. Ajortoortoqariartortoqartarpoq. Nunatsinnili politikerit aalisarnermut naleqqussaanissamut qanoq sivisutigisumik periarfissaqarnerat oqaatigiuminaappoq.
- Aalisarnermulli ataatsimiititaliarsuup upernaamut innersuussuteqartussaanera pitsaalluinnartuusoraara, innersuussuteqarneratalu kingornatigut iliuuseqartoqarnissaa piffissami qaninnerusumiippoq.
Naliliinerlu imaappoq, aalisartut ataasiakkaat naammattunik aningaasarsiniarnermik ilungersuuteqartut allatut aningaasarsiortariaqalersinnaassapput, imaluunniit aalisartut qassiiusut ataatsimuulertariarsinnaassallutik.
