Coronap ilungersunartorsiortitsinera Grønlandsbankenip siuariartorneranut uniffiliisoq

Grønlandsbanken ukiuni qassiini siuariartorsimasoq 2020-mi siullermeertumik kinguariartinneqarpoq.

Siorna ukiumut angusat 96,2 millionit koruuniusut ukiumut naatsorsuutini allassimavoq.

Tamanna 2019-imut sanilliullugu 33,9 millionit koruuninik kinguariarneruvoq. Kinguariartoqarnissaali naatsorsuutaavoq, taamaammallu siulersuisut ukiumut angut ilorrisimaarnartuutippaat.

- GrønlandsBANKEN-ip 2020 aallartinnerata nalaani naatsorsuutiginikuuaa akileraarnissaq pitinnagu angusat 120-140 millionit koruunit missaaniikkumaartut, eqqarsaatigigaannilu COVID-19 qanoq nalorninartorsiortitsinikuusoq tamanna aningaaserivimmut naammaginartuuvoq, pisortaq, Martin Kviesgaard oqarpoq.

AAMMA ATUARUK Grønlandsbanken: Sinerissap qanittuani aalisarneq ajutuulerpoq

Coronap ilungersunartorsiortitsinera 40 millionit koruunit tungaanut annaasaqaataasoq

Coronap ilungersunartorsiortitsinera aningaaserivimmut 2020-mi 45 millionit koruunit tungaanut aningaasartuutaasimanissaa Martin Kviesgaardip missiliorpaa.

- COVID-19 suna tamaat sunnerpaa. Tamakkiisumik nalilersussagukku pigisat tunisanit aamma tuninngisanit, aningaasanik taarsigassiinermi annaasanik, ataasiarlugit aningaasartuutigisanik, nalinik nalimmassaanernut aamma ukiup ilaata ingerlanerani suliassat ikilinerani aningaasartuutigalugit 40-45 millionit koruuninik annaasaqarpugut, pisortaq oqarpoq.

AAMMA ATUARUK Grønlandsbankenip akitsuutit nutaat atuutilersilerai

Coronap nunarsuaq tamakkerlugu tunillaassuunnerata kingunerisaanik nunani allani suliffeqarfiit aningaaseriviillu qanoq eqqugaatigisimanerat eqqarsaatigissagaanni annikinnerukannerusumik annaasaqarluni aningaaserivik isumaqarpoq.

Ilungersuatitsinermik qaangiinera naammaginartoq

Aningaseriup assersuutigalugu 2020 pigisamik ilai 20 millionit koruunit nalingannut nalikillilerpai. Nalikilliliinerilli ilarpassui coronamit akunnattooqqanermut atatillugu nalorninermik pissuteqarput

- Taakku 20 millionit koruunit sullitatsinnut ataasiakkaanut nalikilliliinernut qaavatigut immikkoortinneqarnikuupput, mianersortutullu nalilerparput. Sullitagut inuussutissarsiortut amerlanerit aningaasaqarnikkut ingerlalluarput, sullitagullu suliffissaaleqineq peqqutigalugu aningaasanik taarsigassiinerup tungaatigut eqqugaanngillat, Martin Kviesgaard nalunaarummi oqarpoq.

AAMMA ATUARUK Grønlandsbanken qasukkarpoq

Siulersuisut 2021-mi akileraannginnermi angusat 115-it aamma 135-t millionit koruunit missaanniinnissaat naatsorsuutigaat.