Karl Tobiassen 57-inik ukioqartoq KNAPK-mi siulersuisuunerni ilaasortaavoq.Assi: KNR

Sinniisumiit Naalakkersuisunngortoq – maanna akisussaaffimmik pingaaruteqarnerpaamiilertoq

Karl Tobiassen aatsaavissuaq naalakkersuisunngorpoq. Taassumalu naalakkersuisuuffigiligaa nunatsinnut pingaarutilerujussuuvoq.

Karl Tobiassen Qaarsuneersoq (S) siorna 111-inik taaguunneqarluni inatsisartunut iserpoq. Taanna toqqaannartumik inatsisartunut qinigaanngilaq – sinniisunili qullersaalluni inissippoq.

Taassuma Siumut sinnerlugu siorna 796-inik taaguunneqarluni Inatsisartunut ilaasortanngortoq Qarsoq Høegh-Dam, ikiaroornartulerisimanini peqqutigalugu akiligassinneqartoq, Inatsisartuniit tunuarpoq. Suliaq Inatsisartunit akuerineqarnissaa ilimaginagu taanna nammineerluni inatsisartuniit tunuarpoq.

Taava Karl Tobiassenip taassuma issiavianut inissinneqarpoq. 57-inik ukiulik KNAPK-mi siulersuisuunernut ilasortaq, Siumumeersoq Karl Tobiassen, Aqqaluaq B. Egede taarserlugu aalisartunut piniartunullu naalakkersuisunngorpoq.

Naalakkersuisooqatigiilersut pillugit
 

Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.

Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq

 

2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.

 

Atassut siorna novembarimi ikorfartortaajunnaarpoq. Naleraq ataasinngormat peersinneqarpoq.

Maanna Siumut sisamanik naalakkersuisuutitaqalerpoq Kim Kielsenilu Inatsisartuni siulittaasunngorluni. 

-  Akisussaaffimmik tigusigaangama pimoorussisarpunga, taanna aamma immaa ilisarnaatigivara, tunniusimallunga sulisarpunga aammalu taanna naatsorsuutigineqassaaq.

Piniartut avinngarusimasumiittut

Naalakkersuisunngorlaaq ulapissaqaaq. Aalisarnermut inatsisissaq ukiup pingasut matuma siorna naammassereersimasussaq ulapputissaata ilagaat. Inuit Ataqatigiit Siumullu naalakkersuisooqatigiilernermik isumaqatigiissutaanni allaqqavoq “Aalisarneq pillugu inatsisissaq inuiaqatigiit susassaqartullu qanimut suleqatigalugit sulineq nanginneqassaaq naammassineqarlunilu”

 

AAMMA ATUARUK Ataatsimut isigalugu: Naalakkersuisunut ilaasortat nutaat aaku

Aalisarnermut inatsisissamut tunngatillugu Ataatsimiititaliarsuaq isumaliutissiissutaa naammassereerpoq.

Isumaliutissiissummi sinerissap qanittuani aalisartut ikilinissaat sakkortuumik inassutaavoq. Pisassiissutillu Pinngortitaleriffiup innersuussutaanut malinnissasut innersuussutigaat. Massakkutulli aalisarneq ingerlanneqaannassappat aalisakkat pisarineqartartut ikiliartussasut taamaalillutillu aalisartut aningaasaatikinnerulissasut ataatsimiititaliarsuup isumaliutissiissutaani allaqqavoq.

Karl Tobiassen aalisarnermut inatsisissaq oqallisaaqisoq, naalakkersuisuusarsimasut arlalissuit aamma suliarisimasaat naammassiniartussaavaa. Piniartulli atugaannik aamma oqilisaakkusuppai.

- Isorliunerusuni piniarnerinnarmik inuussutissarsiuteqartut annertunerpaatigut pisortanut saaffiginninneq ajortut taakkua atugaasa oqilisaassiffiginissaat avaqqussinnaanngilarput.

- Taannaannarluinnaq eqqarsaatigalugu suliassaq annertoorujussuuvoq, Karl Tobiassen oqarpoq.

Utoqqaat kiffaanngissuserlu

Nutaamik naalakkersuisooqatigiiliiortoqarnerani Siumumeersunik sisamanik naalakkersuisunngortoqarpoq. Erik Jensen Ineqarnermut Attaveqaasersuutinullu Naalakkersuisoq kiisalu siulittaasup tullersortinngorpoq.

Jes Svane Isumaginninnermut sulisoqarnermullu naalakkersuisunngorpoq,  Vivian Motzfeldt Nunanut Allanut, Inuussutissarsiornermut Niuernermullu Naalakkersuinngorluni.

Jess Svane siusinnersukkut Inuussutissarsiornermut Nukissiuuteqarnermullu 2019-imi naalakkersuisuuvoq. Qasigiannguani aamma Qaasuitsup kommuniani borgmesteriunikuuvoq.

AAMMA ATUARUK Suliat pingasut IA-p Naleqqallu akornanni avissaartuussutaasut

Taassuma utoqqaat immikkut sullinniarlugit KNR-imut oqarpoq.

- Utoqqarnut tunngasut initoorujorujussuarmik sammineqarnikuupput, aamma taanna naatsorsuutigivara annertuumik sammeqqissallugu. Kisianni aamma isumaginninnerup iluani suliassaqarpunga, taanan oqarpoq.

Vivian Motzfeldt qinersiviup siuliani Inatsisartuni siulittaasuusimasoq nunanut allanut tunngasunut naalakkersunngortinneqarpoq. Taanna naalakkersuisuuffimmi tassani issiareernikuuvoq.

- Naalagaaffik peqatigitillugu namminiussuseq nunanut allanut oqartussaaffiit iluani annikippoq, taassuma annertusartuarnissaa, namminiussutsitta nukittorsartuarnissaa qulequttat pingaarutilerujussuit uagutsinnut oqallisissatut pisussaaffiliipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl