Ataatsimut isigalugu: Naalakkersuisunut ilaasortat nutaat aaku

Naalakkersuisut nutaanik ilaqalerput. Inuit Ataqatigiit arfinilinnik Naalakkersuisuutitaqassapput Siumullu sisamanik Naalakkersuisuutitaqarluni. Kim Kielsen Inatsisartunut siulittaasunngorpoq.

Naalakkersuisut nutaat akuerineqaqqammerluinnarput. Nalerarmi ippassaq naalakkersuisoqataajunnaarsinneqarpoq, tassungalu taarsiullugu Siumut naalakkersuisoqataalerluni.

Naalakkersuisoqatigiilersut tassaapput Siumut aamma Inuit Ataqatigiit taakku ataatsimut qulinik naalakkersuisortaqarput - taakkulu inissititerneqaqqammerluinnarput.

  • Naalakkersuisut Siulittaasuat: Múte Bourup Egede (IA)
  • Ineqarnermut Attaveqaqatigiinnermullu Naalakkersuisoq aammalu Siulittaasup tullia: Erik Jensen (Siumut)
  • Aningaasaqarnermut Naligiisitaaanermullu Naalakkersuisoq: Naaja H. Nathanielsen (IA)
  • Aatsitassaanut Inatsisillu Atuutsinnerannut Naalakkersuisoq: Aqqaluaq B. Egede (IA)
  • Meeqqanut, Inuusuttunut Ilaqutariinnut Peqqissutsimullu Naalakkersuisoq: Mimi Karlsen (IA)
  • Ilinniartitaanermut, Kultureqarnermut, Timersornermut Ilageeqarnermullu Naalakkersuisoq: Peter P. Olsen (IA)
  • Nunalerinermut, Imminut Pilersornermut, Nukissiutinut Avatangiisinullu Naalakkersuisoq: Kalistat Lund (IA)
  • Nunanut Allanut Inuusutissarsiornermut Niuernermullu Naalakkersuisoq: Vivian Motzfeldt (Siumut)
  • Aalisarnermut Piniarnermullu Naalakkersuisoq: Karl Tobiassen (Siumut)
  • Isumaginninnermut Sulisoqarnermullu Naalakkersuisoq: Jess Svane (Siumut)

Naaja Nathanielsen, Aqqaluaq B. Egede, Mimi Karlsen, Peter Olsen Kalistat Lundilu atuutereerput.

IA-mit Mariane Paviasen attaveqaqatigiinnermut naalakkersuisuusoq kisimi naalakkersuisuujunnaarpoq.

AAMMA ATUARUK Ny koalition med IA og Siumut: Ja, vi har været uenige i mange år - men nu skal vi se fremad

Naalakkersuisoqatigiit nutaat aamma Kim Kielsenip uterneranik kinguneqarpoq, taanna Inatsisartunut siulittaasunngorpoq. Siulittaasunngortoq attortisimasoq oqaaseqartarfimmut ingippoq.

- Qujanaq tamassi qinerassinnga, Kim Kielsen oqarpoq.

Naalakkersuisoqatigiit nutaat pillugit paasissutissat
 

Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.

Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq

 

2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.

 

Atassut siorna novembarimi ikorfartortaajunnaarpoq.

 

Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.

 

Naleraq ullumikkumut pingasunik Naalakkersuisuutitaqaraluarpoq. 

Taassuma Inatsisartut siulittaasorisimasaat Hans Enoksen (Naleraq) aamma qujassuteqarfigaa.

- Pilliuteqarsimaqaatit. Eqqissillutillu aasarsiorluarina, Kielsen Enoksenimut oqarpoq.

Ukioq ataaseq naalakkersuisoqatigiittut

Naalakkersuisoqatigiissimasut IA Nalerarlu ukiumi ataasingajammi naalakkersuisoqatigiipput. Qinersisoqarneranit aqagu ukioq ataasinngussaaq. Qinersinermi taasinerit kisinneqareerneratigut IA taaguunneqarnerpaasimasoq paasinarsimavoq.

Qinersinermit ullut qulit qaangiuttut apriilip ulluisa 16-ianni naalakkersuisut nutaat katiterneqarput.

Naalakkersuisoqatigiinnerallu ippassarmut killeqarpoq. Hans Enoksenip oqarnera parteerit naalakkersuisoqatigiinnit suleqatigiumaneqarunnaarpoq, Siumullu siulittaasuata, Erik Jensenip oqarnera naapertorlugu Siumup IA-llu Naleraq peqatiginagu naalakkersusisoqatigiilernissamut isumaqatigiinniarnerat sapaatip akunnerata naanerani aallartippoq.

Tamanna Naleqqap siulittaasuata, Hans Enoksenip ippassaq ullaakkut qulingiluanut paasisimallugu KNR-imut oqaatigaa.

AAMMA ATUARUK Ataatsimut isigalugu: Naalakkersuisut nutaat uku sulissutiginiarpaat

Naalakkersuisummi IA-llu siulittaasuata Múte B. Egedep naalakkersuisoqatigisani partii Naleraq naalakkersuisoqataajunnaartoq tassani nalunaaruteqarfigaa. Hans Enoksenip tamanna oqaatigaa.

Taassuma akunnerit marluk qaangiuttut Múte B. Egede Erik Jensenilu naalakkersuisoqatigiinnissamik nutaamik atsioqatigiissuteqartut takuaa.

 

Enoksenip oqarnera naapertorlugu Naleraq IA-lu ukiorli imminnut ungasilliartulersimapput - Múte B. Egedep Naleqqap suleqatigiunnaarnera allamik oqaasertalernagu ima oqaatigaa:

- Nalerarlu politikkikkut isumaqatigiinngikkaluttuinnarnerput maluginngitsoorneqarsinnaanngilaq.

- Tassunga killeqartinniarpara.

Inuit Ataqatigiit Naleqqallu akornanni aaqqiagiinnginnerit annertuut naalakkersuisoqatigiikkunnaarnerannik kinguneqarput. Taakku pillugit uani atuagaqarsinnaavutit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl