Suliat pingasut IA-p Naleqqallu akornanni avissaartuussutaasut
Inuit Ataqatigiit Nalerarlu ippassaq naalakkersuisoqatigiikkunnaarput.
Naleqqap siulittaasuata, Hans Enoksenip oqarnera naapertorlugu partiit marluk imminnut ungasilliartuinnarsimapput.
- Qasutissimagunarpagut, naalakkersuisoqatigiinnissamut isumaqatigiissutitsinni kissaatigut tamaasa piviusunngortinniarlugit sukataarpallaarsimavugut. Ukioq immitsinnut ungasilliartulerpugut, Hans Enoksen KNR-imut oqarpoq.
Naalakkersuisoqatigiit nutaat pillugit paasissutissat
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq.
Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.
Naleraq ullumikkumut pingasunik Naalakkersuisuutitaqaraluarpoq.
Naalakkersuisoqatigiikkunnaarnissaanulli pissutaasut siorna ukiakkut ataatsimiinnermi aallarnerneqarunarpoq.
1. Aningaasanut inatsit aamma qaleralinnut akitsuut
Qaleralinnut akitsuut peerneqanngippat Naleraq aningaasanut inatsisissatut siunnersuummut taaseqataajumanngilaq. Naak partiip nammineq – tassa naalakkersuisut tamanna aningaasanut inatsimmut siunnersuutigigaluaraa.
AAMMA ATUARUK Naleraq aningaasanut inatsisissatut siunnersuummut akerliliivoq: Qaleralinnut akitsuut peerneqassaaq
Taamanimi Naleqqakkut politikkikkut oqaaseqartuata, Jens Napaattuup qaleralinnut akitsuut peerneqarnianngippat aningaasanut inatsisissatut siunnersuummut Naleqqakkut akuerseqataanavianngitsut nalunaarutigaa.
Inuit Ataqatigiit Inatsisartunut qaleralinnut akitsuutip peerneqarnissaa qineqqusaarutiginikuuaat kingornali paasinarsivoq akitsuut aningaasanut inatsisissamut missingersuummi ilaasoq.
Akitsuutip peerneqarnissaa Inuit Ataqatigiit qineqqusaarutiginikuuaat – taamaakkaluartorli aningaasanut inatsisissatut siunnersuummi akitsuuserlugu missingersuusiorneqarpoq. Tamanna nunatta karsianut ukiunut sisamanut tulliuttunut ukiumut 16 millionit koruuninik iluanaarutaalluartussaavoq.
Qaleralinnulli akitsuut siunnersuummit peerneqarpoq, Nalerarlu taaseqataalluni.
2. Umiarsualimmik atuinermut akiliut
Isumaqatigiinngissutit angisuut aappaat umiarsualivimmik atuinermut akiliuteqartarnissamut tunngavoq. Tamanna attaveqaatersuutinut naalakkersuisup, Marianne Paviasenip (IA) sineriammi umiarsualivinnut atuutsilersinniarsaraa.
AAMMA ATUARUK Knaster i koalitionen: Uenighed mellem Jens Napaattooq og Mariane Paviasen
Suliami pineqartoq tassaavoq Nuummi aalisartut pisaminnik tunitsiartoraangamik tonsimut pisaminnut 38 koruunimik umiarsualivimmut Sikuki Harbourimit ingerlanneqartumut akiliisassapput. Mariane Paviasenillu tamanna nunatsinni illoqarfinnut anginerusunut umiarsualiviinut nungullarsimasunut aamma atuutilersinneqarnissaa pilersaarutigaa. Naalakkersuisut oqarnerat naapertorlugu umiarsualiviit aserfallatsaaliornerat 270 millionit koruuninik aningaasartuutaasarpoq.
Tamanna Naleqqap peqataaffiginianngilaa, Jens Napaattuullu Paviasenimut tapersersuinini tuniartinniarlugu siorasaarutigaa.
Brobergip pititsinera
Inuit Ataqatigiit Naleraq aamma ilorrisimaarutigisimanngilaa.
Ilorrisimaarutiginninnginnera aasaanerani ersarissilluinnarpoq, Múte B. Egedemmi (IA) Pele Broberg nunanut allanut tunngasunut naalakkersuisuujunnaarsippaa.
AAMMA ATUARUK Pele Brobergip kingunerisaanik nikititerinermi naliliineq: IA Nalerarlu imminnut pisariaqartipput
Tamanna Pele Brobergip danskit aviisiannit Berlingskemit apersorneqarnermini namminiilivinnissamut tunngatillugu siunissami innuttaasut taasinissaannut naggueqatigiinnik inunnik tunuliaqutaqartut kisimik taasisinnaasariaqarneranik oqarnerata kingorna pivoq.
Múte B. Egedep Brobergip oqaaserisai Naalakkersuisut politikkerinngikkaat oqaaseqarluni naqqiissuteqapallappoq.
Pele Brobergip nunanut allanut naalakkersuisuuffini tamatuma kingunitsianngua annaavaa.
