Pele Brobergip kingunerisaanik nikititerinermi naliliineq: IA Nalerarlu imminnut pisariaqartipput
- Kikkut ajorsarnersut ajugaanersulluunniit uani nalilerneqarsinnaanngitsoq isumaqarpunga. Naalakkersuinikkut issiasut ingerlaanarnissaanut, tamannalu pingaarnerutinneqassasoq, iliuuseqarnissamik isumaqatigiittoqarsimavoq, Dansk Institut for Internationale Studieni, Kalaallit Nunaannut naalagaaffeqatigiinnermullu sammisaqarluni ilisimatuujuneq, Ulrik Pram Gad oqarpoq.
Nunanut allanut naalakkersuisoqarfik Naalakkersuisut siulittaasuata tigummisarilissagaa, taavalu meeqqanut, inuusuttunut ilaqutariinermullu naalakkersuisoqarfik Naleqqameersumut Paneeraq Olsenimut Naalakkersuisuni nikititerinermi tunniunneqarpoq.
Nikititerineq tukappasileraluartoq naggataatigut ajunngitsumik aaqqiissuteqarfigineqarsimasoq, ilisimatuujunerup nalilerpaa.
AAMMA ATUARUK Múte B. Egede Pele Broberg pillugu nikititerisoqarnermut: Aaqqiissut taanna pitsaanerpaavoq
- Ukiut qulit ingerlanerini arlaatigut isumaqatigiinngissuteqartoqaraangat naalakkersuisunik allanngorartitsisarneq nalinginnaasuuvoq.
- Isumaqatiginninniarpallaarnani naalakkersuisuutitanik taarsiisoqaannartarpoq. Massakkullu isumaqatigiissutiginninniarnermik takutitsisoqarpoq, tamannalu pingaarutilimmik ilikkarfissaassasoq isumaqarpunga, ilisimatuujuneq oqarpoq nangillunilu:
- Tamanna politikkikkut nukittunermik takussutissaasinnaavoq. Partiimi taakku marluk naalakkersuisuutitaqassagunik immiminnut pisariaqartipput, Ulrik Pram Gad oqarpoq.
AAMMA ATUARUK Pele Broberg nunanut allanut tunngasunut naalakkersuisuujunnaartoq
Ulrik Pram Gad kisimiilluni taama isumaqanngilaq.
Ukiorpassuarni politikkilerisimasoq Siumumeersoq, Naalakkersuisunullu siulittaasuusimasoq Lars-Emil Johansen, aperigaanni, aaqqiinneq "pitsaasumik akuerineqarsinnaasumillu" oqaatigaa.
- Múte Bourup Egedip uani iliuusaa isumaqarpunga ajunngivissoq aamma torrallataasoq, aamma eqqoriakannersimavara taamatukanneq nammineq iliorsimassagaluarlunga uanga tassaniikkaluaruma, Lars-Emil Johansen oqarpoq.
- Oqarsinnaavunga paasilluarpara. Ajugaasumik oqalussagutta Naalakkersuisut siulittaasuat uani ajugaavoq.
- Qularnanngitsumillu illuatungeriinnut naammagisimaarnartutut oqaatigisariaqarpoq. Politikkikkut suulluunniit ajornartorsiutit aaqqinniarnerani pingaarnerpaasutut uanga isigiuaannarpara aappaa ajugaasutut aappaa ajorsartutut inissisimanani, kisianni tamarmik illuatungeriit iluarisaannik sapinngisamik tassunga qanittumik aaqqiinissaq, tamarmik ajugaasutut misigisimallutik, Lars-Emil Johansen KNR-imut oqarpoq.
