Múte B. Egede Pele Broberg pillugu nikititerisoqarnermut: Aaqqiissut taanna pitsaanerpaavoq

- Naalakkersuisoqatigiinninngaanniit aaqqiissutissanik ujartuinissaq inuiaqatigiillu qitiutillugit sulinissaq ingerlariaqqinnissarlu tunngavigalugu isumaqatigiissuteqarpugut, taamaammat nunanut allanut naalakkersuisoqarfik uannit akisussaaffigineqarnissaa aaqqinneqarpoq.

Naalakkersuisut siulittaasuat, Múte B. Egede Inatsisartuni ilaatigut Pele Brobergip (Naleraq) marlunnik naalakkersuisuuffeqarunnaarneranik ilaqartumik sivisuumik ataatsimiinngornerup kingorna oqarpoq.

Naalakkersuisut siulittaasuata, Múte B. Egedep nunanut allanut tunngasunut silallu pissusianut tunngasunut maanna naalakkersuisuulerpoq.

AAMMA ATUARUK Pele Broberg nunanut allanut tunngasunut naalakkersuisuujunnaartoq

Pele Brobergip inuussutissaqarneq niuernerlu kisiisa naalakkersuisuuffigilerpai.

Suliaq Pele Borbergip naggueqatigiinnik inunnik tunuliaqutaqartut namminiivilinnissamut tunngatillugu taasinerni kisimik taasisinnaasariaqartut sapaatip akunnerata siuliani sapaammi oqaaseqarneratigut aallartippoq.

Nunatta soqutigisai nakkutiginiarai

Naalakkersuisut siulittaasuat, Múte B. Egede (IA) sukkasuumik naqqiissuteqarluni Borbergip oqaaserisai Naalakkersuisut politikkerinngikkaat oqaatigaa.

Tamatuma kingunitsianngua partiip ikorfartortaasup Atassutip Broberg tatigiunnaarlugu nikititerisoqarnissaa kissaatigalugu nalunaarutigaa.

- Piffissami kingullermi naalakkersuisoqatigiit ilutsinni nalilersuisimavugut, nalilersuisimanerpullu aallaavigalugu nunanut allanut naalakkersuisoqarfik Naalakkersuisut siulittaasuaninngaanut ingerlanneqassasoq isumaqatigiissutigalugu, Múte B. Egede oqarpoq.

Taassuma Inatsisartuni Nunanut allanut sillimaniarnermullu ataatsimiititaliaq ataatsimiigiaqquniarpaa:

AAMMA ATUARUK Atassutip Pele Broberg pillugu nikititerisoqarnera ilorrisimaarutigigaa

- Suliassara pingaarnerpaaq tassaavoq inuiaat kalaallit soqutigisaat aallaavigalugit sulissallunga, kisiannili aamma Inatsisartut annertuumik massakkut ilaatigut ujartorsimasaat qinigaaffiit akimorlugit tassalu nunanut allanut politikkiat ataatsimoorfiusumik nunatsinninngaanniit pilersissallugu sulineq aamma ingerlakkumaarlugu.

Naalakkersuisoqatigiinni suleqatigiinnersi qanoq ippa?

- Naalakkersuisoqatigiit iluanni ammasumik aammalu pitsaasumik oqaloqatigiinneq aallaavigalugu aaqqiissutissanik ujartuineq ingerlapparput, aammalu taanna tunngavigisimavarput, taannalu tunngavigeqqissallugu.