Atassutip Pele Broberg pillugu nikititerisoqarnera ilorrisimaarutigigaa

Aqqalu Jerimiassenip Pele Broberg pinnani Múte B. Egedep nunanut allanut tunngatillugu avammut saqqummertartussanngornera toqqissisimanarnerutippaa.
- Nunatta avataanut innarliutaasinnaasumik oqariartornera assigiinngitsut assigiinngitsut pereertullu, maannakkut nunanut allanut naalakkersuuffik allamut ilisassanngormat uagut naammagisimaarparput, Aqqalu Jerimiassen oqarpoq.
Allattoq Malik Brøns, Mads Malik Fuglsang Holm
septembarip 27-at 2021 15:18

Naalakkersuisuni ullumi nikititerisoqarpoq.

Nunanut allanut, niuernermut, inuussutissaqarnermut silallu pissusiinut tunngassutilinnut Naalakkersuisup Pele Brobergip atuuffii ulluni annikillipput.

Naalakkersuisummi siulittaasuata, Múte B. Egedep (IA) nunanut allanut tunngasunut naalakkersuisoqarfik Pele Brobergimit tiguaa.

Tamanna Atassutip siulittaasuata, Aqqalu Jerimiassenip nuannaarutigaa. Taassumami Pele Brobergip nunanut allanut tunngasunut susassaqarfimmiikkunnaassasoq piumasaqaatigaa.

AAMMA ATUARUK Pele Broberg nunanut allanut tunngasunut naalakkersuisuujunnaartoq

Berlingskemut sapaatip akunnerata siuliani oqaatigaa, taassumalu oqaaseq taanna danskit nunatsinnik naalagaaffiginninnerannut patsisaanerarpaa.

- Nunatta avataanut innarliutaasinnaasumik oqariartornera assigiinngitsut assigiinngitsut pereertullu, maannakkut nunanut allanut naalakkersuuffik allamut ilisassanngormat uagut naammagisimaarparput, Aqqalu Jerimiassen oqarpoq.

- Maannalu Naalakkersuisut siulittaasuat nunanut allanut tunngasunut akisussaaffiginnilerpoq, taamaaliorneralu ilorrisimaarutigaarput. Tamanna qularnaannerusoraarput.

Pele Brobergimmut annertuumik qingaliisoq

Naggueqatigiinnik inunnik tunuliaqutallit namminiilivinnissamut tunngatillugu taasititsisoqarnerani kisimik taasisinnaasariaqartut Pele Brobergip aamma oqaatigaa.

Naalakkersuisut siulittaasuat, Múte B. Egede (IA) sukkasuumik naqqiissuteqarluni Borbergip oqaaserisai Naalakkersuisut politikkerinngikkaat oqaatigaa.

AAMMA ATUARUK Berlingske: Pele Broberg kukkusumik issuanngilarput

Tamatuma kingunitsianngua partiip ikorfartortaasup Atassutip Broberg tatigiunnaarlugu nikititerisoqarnissaa kissaatigalugu nalunaarutigaa.

- Atassumminngaanniik naammagisimaannartumik Naalakkersuisup siulittaasuita naalakkersuisuutitaminuttaaq annertuumik qingaliinerminik takutippaa akisussaaffinilu sumiinnersoq qimarratiginagu aaqqiissuteqarluni, Aqqalu Jerimiassen oqarpoq.

Pele Broberg nikititerisoqarneranut oqaaseqarusunngilaq. Taassuma Naalakkersuisut siulittaasuat, Múte B. Egede innersuussutigaa.

KNR-ip Múte B. Egede oqaaseqartinniarsaraa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk