Assi: KNR

Pele Broberg nunanut allanut tunngasunut naalakkersuisuujunnaartoq

Múte B. Egedep Pele Brobergip nunanut allanut tunngasunut naalakkersuisuuffia akisussaaffigilerpaa.

Naleqqamit Pele Broberg nunanut allanut tunngasunut naalakkersuisuujunnaarsinneqarpoq, taannali inuussutissanut niuernermullu naalakkersuisuuginnarpoq.

Naalakkersuisut siulittaasuata, Múte B. Egedep (IA) naalakkersuisuuffik taanna tiguaa.

Taamaalilluni Pele Brobergip (N) namminiilivinnissamut tunngatillugu taasisoqassagaluarpat naggueqatigiit inuit kisimik taasisinnaasariaqarneranik sapaatip akunnerata siuliani aviisimut Berlingskemut oqaaseqarnera tassunga kinguneqartinneqarpoq.

AAMMA ATUARUK Inatsisartuni naalakkersuisumik aqqanermut toqqaasoqassasoq

Naalakkersuisut siulittaasuat, Múte B. Egede (IA) sukkasuumik naqqiissuteqarluni Borbergip oqaaserisai Naalakkersuisut politikkerinngikkaat oqaatigaa.

Tamatuma kingunitsianngua partiip ikorfartortaasup Atassutip Broberg tatigiunnaarlugu nikititerisoqarnissaa kissaatigalugu nalunaarutigaa.

Múte B. Egedep nunanut allanut tunngasunut naalakkersuisoqarfimmik Pele Brobergimit tigusinermi saniatigut silap pissusianut akisussaaffik aamma tiguaa.

KNR-ip Múte B. Egede Pele Brobergilu nikititerineq pillugu oqaaseqartinniarsarai.

Meeqqanut, inuusuttunut ilaqutariinnullu Naalakkersuisoq nutaaq

Naalakkersuisoqarfinni nikititerisoqannginnerani Naalakkersuisut aamma nutaartaqalerput.

Naleqqamiimmi Paneeraq Olsen naalakkersuisutut nutaatut qinerneqarpoq. Taassuma meeqqanut, inuusuttunut ilaqutariinnullu naalakkersuisoqarfik Eqaluk Høeghip (IA) tunuarnerata kingorna Mimi Karlsenimit (IA) akisussaaffigineqarallarsimasoq tiguaa.

AAMMA ATUARUK Paneeraq Olsen meeqqanut inuusuttunut ilaqutariinnullu naalakkersuisunngortoq

Taassuma naalakkersuisunngornissaa Múte B. Egedep Inatsisartut Ukiakkut Ataatsimiinneranni siunnersuutigaa.

Naalakkersuisut siulittaasuata, Múte B. Egedep (IA) meeqqanut, inuussuttunut ilaqutariinnullu naalakkersuisumik Eqaluk Høeghimut qaammatip ataatsip matuma siorna tunuartumut taarsiisussamik naalakkersuisunngortoqassasoq tallimanngormat oqaatigaa.

Eqaluk Høegh uipppakajaarnini pissutigalugu naalakkersuisutut tunuarnikuuvoq. Taannalu Inatsisartunit aamma sulinngiffeqarluni.

Paneeraq Olsen Inatsisartunut qinersinermi 99-init taaguunneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl