Napaattooq naalakkersuisumut: Siunnerfitsinnik uniuivutit

Nuummi umiatsiaaqqamiit aalisartut umiarsualivinnut inatsit 2015-meersoq naapertorlugu, aalisakkanik qalerualinnillu 1 tonsimik tunisigaagamik umiarsualivimmut koruunit 38-t akiliutigisarpaat.

Illoqarfinni anginerni allani aamma akeqalissasoq, attaveqaasersuutinut naalakkersuisoq, Inuit Ataqatigiinneersoq, Mariane Paviasen, KNR-mut allakkatigut akissuteqarluni oqarpoq.

Tamanna naalakkersuisoqataasut partiianni, Naleqqami oqaaseqartartup tupaallaatigaa.

- Naalakkersuisup umiatsiaararsortunut akiliuteqartarnerup peerneqarnissaanut tapersiinnginnera, isumaqatigiissummik Inuit Ataqatigiinnut siunnerfitsinnut uniuivoq, Jens Napaattooq KNR-mut oqarpoq.

Naalakkersuisoqatigiinnissamulli isumaqatigiissummi umiarsualivinnut akiliisarunnaarnissaq allassimanngilaq.

Naalakkersuisut akiliititsisarsinnaasut akinillu aalajangersaasinnaasut, umiarsualiaviit pillugit Inatsisartut inatsisaanni allaqqavoq. Attaveqaasersuutinullu naalakkersuisup tamanna malimmagu Inuit Ataqatigiit inatsisartuni ilaasortatitaasa siulittaasuata naalakkersuisoq tapersersorpaa.

- Naalakkersuisup inatsit soorunami malittussaavaa, inatsimmillu malinninnera soorunami taanna pisariaqavippoq, Agathe Fontain oqarpoq.

Naalakkersuisoqatigiit suli eqqatunngikkaat

Akiliititsisarneq tulluartuunnginnersoq illoqarfinnullu anginernut siammarneqassannginnersoq IA-p Naleqqallu suli oqaloqatigiissutiginngikkaat taanna oqarpoq.

- Kisianni uagut Inatsisartuni allanngortitserusunnerluta taanna Naalakkersuisoqatigiinni nammineerluta akunnitsinni eqqartussavarput, Agathe Fontain oqarpoq.

Tamannali Naalakkersuisoqataasa namminneq suliassamittut isiginngilaat.

- Taanna iluminni aaqqillugu piaartumik uagutsinnut inuiaqatigiinnullu pingaaruteqaqimmat kalerriutigisariaqalerpaat ilumut isumaqatigiissuteqartugut taannalu siunnerfiussasoq, Jens Napaattooq oqarpoq.

Naalakkersuisut atuisut akiliutaat umiarsualivinnut aserfallatsaaliinissamut maannamut 270 millioninik kinguaattoorfiusumut atorusuppaat.