Napaattooq: Naalakkersuisut umiarsualivinnik atuinermut akiliititsisarunnaassapput

Naleqqamit Inatsisartunut ilaasortap, Jens Napaattuup, nuna tamakkerlugu umiarsualiviit tamarmik aserfallannikut atuisunit aalisartuniillu akilerneqartassanngitsut angorusuppaa.

Tamannalu anguniarlugu partiit naalakkersuisoqatigiit ataatsimeeqatigai.

- Naalakkersuisoqatigiit siuttui marlunngormat ataatsimeeqatigaagut. Aamma tamannaqqissaaq pillugu oqallittoqaqqippoq, Jens Napaattooq KNR-mut oqarpoq.

Inatsisartunut ilaasortap pissaaneqarluartup Naalakkersuisoqatigiit siuttuannik ataatsimeeqateqarnermini anguniakkani angusussanngorunarpaa.

AAMMA ATUARUK Umiarsualivinnut amigaatit 270 koruunit milliuunit

Umiarsualiviit pillugit inatsit naapertorlugu atuisut akiliisarnissaat illoqarfinni tamani atuutilersinneqarsinnaavoq. Taannalu angutserlugu Naalakkersuisut suliniartut ippassaq tusaraluarparput.

Jens Napaattoorli naalakkersuisoqatigiit siuttui ippassaq oqaloqatigalugit oqarpoq, tamatumalu kingorna allanngorluinnartoqarpasippoq. Jens Napaattuullu oqarnera naapertorlugu, Naalakkersuisoqatigiit siuttuisa attaveqaasersuutinut naalakkersuisoq, Marianne Paviassen, umiarsualiviit atornerat akeqalersinneqarsinnaajunnaarlugu Nuummi Sikukimut akiliisarnerup peerneqarnissaa ilanngullugu siunnersuuteqassaaq.

- Namminneq naalakkersuisoqatigiit siunnerfiannik Naalakkersuisut siunnersuusiussapput Inatsisartut akuerisassannik.

Tamanna qaqugu pissanersoq taassuma akisinnaanngilaa.

Akiligassaq 270 millionit koruunilik

Umiarsualiviit nuna tamakkerlugu iluarsaanneqartariaqartut attaveqaasersuutinut naalakersuisoq oqarpoq. Taakkununnga akiligassaq 270 millionit koruunit missaanniippoq. Taannali atuisunit akilerneqanngippat nunap karsiata qanoq akissaqartissaneraa Naleqqamit qinikkap tigussaasumik akiumanngilaa.

- Pingaarnersiuilluta tulleriiaarinikkut aningaasartai taakkua nanisinnaavagut, Jens Napaatooq oqarpoq.

KNR-p Marianne Paviasen apersorniarsaraa sulili iluatsinnagu.

Sikuki Habourip akigititai naapertorlugit aalisakkat qaleruallillu Nuummi usingiaatigissagaanni tonsimut 38 koruunit akiliutigineqartarput. Angallatit umiarsualiviup talittarfiani talinngasut piginnittui ukiup affakkaarlugu koruuninik 9.937-nik akiliisarput.