Umiarsualivinnut amigaatit 270 koruunit milliuunit

Nunap umiarsualiviini tamani aserfallatsaaliuinermut amigaatit annertoqaat.

Umiarsualiviit arlallit iluarsarneqarnissartik allatulluunniit aserfallatsaaliorneqarnissartik amigaatigaat kingulerunnerup nassataanik.  

Imaassinnaavoq ajoqusernerit mallit, sikup imalunniit umiarsuit talittarfinnut aporsinerisa ajoqusiinerigaat.

Attaveqaasersuutinut Naalakkersuisoq Mariane Paviasen (IA) taama nassuiaavoq.

- Kisitsisit massakkut pigisagut tassaapput aserfallatsaaliinermi 270 millioninik amigaateqartugut tassanilu tamattaalluta suliassaqarpugut annertuumik.

Umiarsualivinni  atuisut akiliisalernissaat pillugu oqallinnerup kingornatigut oqarpoq, tamannalu saqqumilaaqqilerpoq Inatsisartunut ilaasortap  Aslak Jensenip Siumumeersup Naalakkersuisunut apeqquteqaaterneratigut.

Koruunit 270 milliuuninik kisitsisit umiarsualivinni aserfallatsaaliinissamut amigaatit pillugit nalunaarusiami Mariane Paviasenip Naalakkersuisoqarfianeersumeerput, naatsorsuutigaalu siunissami qaninnerpaami saqqummiuneqarumaartoq.

Illoqarfinni annerni atuisut akiliisalernissaat 

Ullumikkut imaappoq aalisartut umiarsualivimmillu atuisut allat umiarsualiviup atorneranut akiliisarmata. Allani taamaaliortoqarneq ajorpoq. Siumumi politikeri isumaqarpoq immikkoortitsinerusoq. Aamma Jens Napaattooq, Naleqqameersoq atuisut akiliisarnissaannut isornartorsiuivoq.   

Tamannalu Naalakkersuisut tungaanniit iliuuseqarfigineqassagunarpoq.  

Tassami illoqarfinni annerusuni atuisut akiliisalernissaasa eqqunneqarnissaat sulissutigineqarpoq. Taamanikkut attaveqaasersuutinut naalakkersuisoq  Karl Frederik Danielsen (S) 2020-mi oqarpoq Mariane Paviasenillu suliaq taanna nangippaa.

AAMMA ATUARUK Naalakkersuisut piumasaraat umiarsualiviit amerlanerit atuisunit akiliiffigineqartalernissaat

Naalakkersuisut naapertorlugit atuisut akiliisalernissaanni siunertat pingaarnersaraat umiarsualiviit ullumikkumut naleqiullugu pitsaanerulersinnissaat, annerulersinnissaat imalunnnit isumannaannerulersinnissaat.

Nunami maani inissianut aserfallatsaaliinnermut annertuumik amigaatit assigipajaarlugit aamma umiarsualiviit aserfallatsaalineqarnissaannut kinguleruttoqarpoq.

Taamaattumik Kalaallit Nunaanni umiarsualiviit ineriartortinnissaannut imaluunniit isumannaarsarnissaannut aningaasat amerlanerusut pisariaqartinneqarput. Tasiilamiikkaluaraani imaluuniit Uummannamiikkaluaraanni.Tassami 2017-imiit 2027-imut Umiarsualivinnut Pilersaarut naapertorlugu tamnna umiarsualivinnut arlalinnut atuuppoq. Inissaaleqisoqarpoq.

Pilersaarutini assersuutigalugu Ilulissanut allassimavoq unammilligassat inissaq annersarigaat. Tattoqisaannartorujussuuvoq, aalisarnermillu inuussutissarsiuteqarnermut usingiarnermi atugassarititaasut annikeqaat.

Aamma ilaasartaatit ilaasunik ikisoqarnissaat niusoqarnissaallu periarfissakeqaaq. Aamma allassimavoq takornariartaasssuit talinnissaat piviusorsiortuunngitsoq, naak Ilulissat illoqarfittut takornariaqarfittut pingaaruteqaraluaqisoq.

Uummannaq aamma inissaaleqisuuffiuvoq, pilersaarummilu allaqqavoq umiarsualivik sineriallu qanittoq  ilulissanit kinngusunit umiarsualiviup malissuarnit ajoquserneqarsinnaasoq. Aamma siku ilulissallu umiarsualivimmi katersuussinnaapput umiarsuillu angallatillu minnerit tulassinnaannginnerannik kinguneqartumik.   

Atuisut akiliisarnissaat peerneqassappat allannguuteqarnissaa siunnersuutigisariaqarpoq 

Taamattumik umiarsualivinnik atuisut akiliuteqartalernissaannut uterpugut. Kalaallit Nunaanni umiarsualiviit aserfallatsaalineqarnissannut ineriartortinnissaannullu aningaasanik atorfissaqaqartitsisoq, taavalu aalisartut ilimagissavaat umiarsualiviup atornissaanut akiliisalissallutik.

Pilersaarutaavormi illoqarfinni annerusuni atuisut akiliisarnissaaq eqqunneqassaaq. Kisianni sumi qaqugulu tamanna pissanersoq Mariane Paviasen-ip oqaatigisinnaanngilaa.  

Kisianni isornartorsiuisut soorlu Aslak Jensenip imaluunniit Jens Napaattuup atuisut akiliisalernissaat peersikkusuppassuk, taava Inatsisartukkoortariaqaqqaassaaq.

- Inatsisit maannakkut malillugu taamatut inissisimavugut, taannalu inatsiseq allanngortinneqassaguni aatsaat Inatsisartukkooqqaarlugu allanngortinneqarsinnaavoq taavalu taanna Inatsiseq aallaavigalugu Naalakkersuisut sulisussaammata soorunami inatsiseq malillugu sulivugut, naalakkersuisoq oqarpoq.