- Taama tukatsigisumik sangujoraartigisumillu sinerissap qanittuani qaleralinniartunut Naalakkersuisut aqutsiniarsarinerat unissasoq Siumumit ilungersorluta kissaatigaarput, Karl Tobiassen tusagassiuutinut nalunaarummi oqarpoq.Assi: KNR/Anton Gundersen Lihn

Siumup qalerallit pillugit sangujoraartoqarunnaarnissaa kaammattuutigaa

Aqutsivik tukattuliorfiusoq sangujoraartumillu ingerlaneq. Siumup Qeqertarsuup Tunuani, Uummannami Upernavimmilu qaleralittassiissutinik suliaqarneq taama nassuiaatigaa. Tamanna unitsinneqartartariaqartoq, Karl Tobiassen oqarpoq.

Nunatta avannaani aalisartut siullermik qaammatikkaartumik pissassiissuteqarfiusarput. Tamatuma kingorna ukioq naallugu ataatsimoortunik pisassiissutit malittussanngorpaat. Maannali qaammatit marluk missaat qaangiuttut – Naalakkersuisut nutaanik malittarisassaliorput.

Sinerissap qanittuani Qeqertarsuup Tunuani, Uummannami Upernavimmilu aalisartut, qaleralinniartartut ukiumut pisassiissutit immikkoortut sisamat qaammatinut pingasukkaartut malillugit aalisassapput.

Illuatungiliuttut partiiat, Siumut aperigaanni aqutsineq tukappoq, tamannalu akuersaarneqarsinnaanngilaq.

AAMMA ATUARUK Halibut Greenland: Naalakkersuisut tusaasimavaatigut

- Pisassiissutit ukiumoortunngortinnissaanik Naalakkersuisut aalajangiigaluarneraniit qaammatit marluunngitsulluunniit qaangiupput, maannalu sammivik nassuiaatitaqanngitsumik allanngortinneqarluinnaqqissaarpoq.

- Taama tukatsigisumik sangujoraartigisumillu sinerissap qanittuani qaleralinniartunut Naalakkersuisut aqutsiniarsarinerat unissasoq Siumumit ilungersorluta kissaatigaarput, Karl Tobiassen tusagassiuutinut nalunaarummi oqarpoq.

Inuussutissarsiornermi ernumasoqarnera pissutigalugu nutaanik malittarisassaqalersoq

Inuussutissarsiuteqartut ukiumoortumik pisassiissutinik aalisarnissamik ernumassuteqarnerat pissutigalugu qaammatit pingasukkaartumik pisassiissuteqartoqartalersoq, aalisarnermut piniarnermullu Naalakkersuisoqarfiup paasissutissiisutigaa.

KNR-ip aalisartut, tunisassiorfiit sulisartullu kattuffiat eqqarsaammik tamatumanik nuannarinninngitsut aamma oqaloqatiginikuuai.

Pisassiissutit aasaanerani tamakkerlugit aalisarneqarnissaat aalisartut ernumassutigaat, Halibut Greenlandillu ukiup naanerani tunisassaarussinnaanissani ernumassutigaa, SIK-lu aalisakkerivimmi tunisassiassaarutissagaluarpat sulisut pillugit ernumalluni.

Ernumassuteqarnerit Namminersorlutik Oqartussat Nuummi allaffeqarfiannut anngupput, tassanilu aalisarnermut piniarnermullu naalakkersuisup, Aqqaluaq B. Egedep (IA) Aalisarneq pillugu siunnersuisoqatigiit oqaloqatigereerneratigut qaammatit pingasukkaartumik pisassiissutit pillugit nutaanik malittarisassiornissaq aalajangerpaa.

AAMMA ATUARUK Naalakkersuisut qaleralittasseeriaatsimik allanngueqqipput

Aalisartulli tunisassiorfiillu oqaloqatigineqaqqaarsimasariaqaraluartut, Karl Tobiassen isumaqarpoq.

- Allannguisarnerit taama annertutigitillugit pisariaqarluinnarpoq atuisut akuutillugit peqataatillugillu allannguutissat tusarniutigineqartarnissaat.

- Matumani pineqarput nunatta aningaasarsiorneranut qitiulluinnarlutik inissisimasut, pineqartullu oqariartuutaasa tusarnaarnissaat pingaaruteqarluinnarpoq, taanna oqarpoq, nangillunilu:

- Akuersaarneqarsinnaanngilaq piffissap taama sivikitsigisup iluani atuisunik tusarniaannguarani aammaarlunilu suusupaginnilluni aalajangersaasoqaqqimmat.

Assigiinngitsunik tiguneqartoq

KNR-ip pisassiissutit nutaat nutaanngoqqittut pillugit oqaloqatigiisaasa ilaat assigiinngitsunik isumaqarput.

Halibut Greenlandimit ilorrisimaarutigineqarpoq, Ilulissaniillu umiatsiaararsortartup ukiumut pisassiissutit nuannarigaliuarpai. Taamaalilluni aasaanerani annermik aalisarsinnaassalluni.

- Aggustimi septembarimiluunniit equngasoqarsinnaavoq. Pisassiissutimmi aggustimi nungunneqarpata septembarimi aalisarsinnaanngilagut. Ukiortinnagu aalisartoqarusunnerusarpoq, Ilaatsunnguaq Berthelsen oqarpoq.

Umiatsiaararsortup malittarisassat piffissap sivikitsup ingerlanerani arlaleriarlugit allanngortinneqarnerat pissutigalugu sulinissamut pilersaarusiornissaq ajornakusoortoq aamma isumaqarpoq:

- Sinerissap qanittuani umiatsiaararsortuulluni namminerlu pisassiissuteqanngikkaanni taama allannguineq siunissamut qulartitsiuaannarpoq.

KNR-ip aalisarnermut piniarnermullu Naalakkersuisoq, Aqqaluaq B. Egede (IA) ulluni kingullerni apersorniarsarigaluarpaa, tamannali periarfissaanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl