Naalakkersuisut qaleralittasseeriaatsimik allanngueqqipput
Qaleralinniarnermi ukiortaami nutaajusumik pisasseeriaaseqalernermik aaqqiineq maanna allangoqqippoq.
Naalakkersuisummi Qeqertarsuup Tunuani, Uummannami, Upernavimmilu sinerissap qanittuani qaleralinniat pisassaat ukiumoortuusut aqunnerulerlugit qaammatit pingasukkaartunngortippaat.
AAMMA ATUARUK Ilulissani aalisartoq: Ukiumut pisassat aasaru nungussuagut
Naalakkersuisut sumiiffinni taakkunani qaleralittassiissutit, qaammatikkaartuujunnaarlutik ukiumoortunngussasut decembarimi aalajangeraluarpaat. Qaammatikkaartumik aalisartitsineq allaffissorujussuarnermik kinguneqartarmat pisariillisarniarlugu taamani taama aalajangeraluarput.
Kattuffik tunisassiorfik aalisartullu akerliusut
Tamannali aalisartunit, tunisassiorfimmit Halibut Greenlandimit, SIK-llu siulittaasuanit sakkortuumik isornartorsiorneqarpoq. Aalisartummi aasaru pisassaarutereernissartik ernumagaat, tunisassiorfiup tunisassiassaarussinnaanini aarlerigalugu, SIK-llu ilaasortani tunisassiorfimmi sulisut suliassaarunnissaat aamma perusunnagu.
Tamakkulu aalisartut naalakkersuisuata, Aqqaluaq B. Egedep niaqorluutigisimavai.
AAMMA ATUARUK Aqqaluaq: Allaffissorpallaarneq tunngaviuvoq
- Aalisarnermut piniarnermullu naalakkersuisup, Aalisarneq pillugu Siunnersuisoqatigiit isummersoqatigisimavai, isummersoqatigiinnerlu tunngavigalugu Naalakkersuisut qaammatinut pingasunut qaleralittassiisarnissamik aalajangiipput, aalisarnermut naalakkersuisoqarfik allappoq.
Pisassat ilaneqassanngitsut
Sulisitsisut KNAPK-lu aalisarneq pillugu siunnersuisoqatigiinnut ilaasortaatitaqarput, Naalakkersuisunullu siunnersuisarlutik.
Naalakkersuisut aamma aalajangerpaat qaammatinut pingasunut qaleralittassiissutigineqartut tamakkerlugit aalisarneqarpata, aalisarneq unitsinneqassasoq, qaammatinullu pingasunut pisassiissutit tullii atuutilerpata aatsaat aalisartoqaqqilissasoq. Aamma ukioq manna qaleralittassat aalajangerneqareersut ilaneqassanngitsut naalakkersuisup aalajangiusimavaa.
