Ilulissani aalisartoq: Ukiumut pisassat aasaru nungussuagut
Qeqertarsuup Tunuani, Uummannami Upernavimmilu sinerissap qanittuani umiatsiaaqqamik qaleralinniarsinnaanerminnik akuersissutillit siorna 1280-it missaanniipput.
Taakkua tamarmik qaammatikkaartumik paggatassaannik 2014-imit ukioq mannamut qaleralittassinneqartarput. Aappagumiilli ukiumoortumik paggatassinneqassasut, Naalakkersuisut aalajangerput.
Qeqertarsuup Tunuani umiatsiaaqqat 4252 tonsinik pisassinneqarput.
AAMMA ATUARUK Sinerissap qanittuani aappaagumut qaleralittassiissutit ilaneqassanngitsut
Aalisartut sukannersumik aqunneqarunnaarunik qaleralinnik qaqitaqarnerulissasut, Ilulissani umiatsiaararsortup ilimagaa. Tassalu seqernup tarrissanani aasaru kaaviinnalernerani, aalisarluarnermi pisassaarussinnaannissaq, taassuma ernummatigaa.
- Uggornaqaaq qaammatikkaartut atorunnaarsinneqalermata. Aasarisseruttortoq nunguutsinissarput qularnanngilaq. Maani umiatsiaararsortorpassuusaramik aasarissinerani. Ilulissat katersuuffiusarnermut, Knud Markussen oqarpoq.
Pisassat ilaneqassanngitsut
2013-mi ukiumut pisassiisoqarmat, taakkua Qeqertarsuup Tunuani juulip naanerani tamakkerlugit qaqinneqarput. Pisassalli nungoreersut Naalakkersuisut kingusinnerusukkut ilavaat.
AAMMA ATUARUK Halibut Greenland: Tunisassiassaarunnissaq ernumanarpoq
Aappaaguli pisassat nunguppata ilaneqassanngitsut, Naalakkersuisut siumoortumik aalajangersimallutik allapput.
Ilulissani tunisassiorfimmi namminersortumi, Halibut Greenlandimi pisortap, Erik Sivertsenip, qaleralittassat juulip naanerani nungussinnaanissaat aamma ernumagalugu KNR-mut siusinnerusukkut oqarpoq.