Halibut Greenland: Tunisassiassaarunnissaq ernumanarpoq
Qeqertarsuup Tunuani umiatsiaararsortut ukiuni kingullerni qaammatikkaartumik paggatassaannik qaleralittassinneqartarput. Tamannali aappaagumit atorunnaassasoq Naalakkersuisut aalajangerput.
Tamanna isumaqarpoq, umiatsiaaqqat 6 meterimit naannerusut, qalerallit 4252 tonsit pisariniarlugit aappaagu ukioq tamaat paggatissagaat. Tamanna Ilulissani tunisassiorfiup namminersortup, Halibut Greenlandip pisortaata uggoreqaa.
- Uggornarpoq taanna siunnerfigineqarsimammat. 13-imi tunisassiassaarukkatta angallatinit pilersorneqarpugut. Ukiumi tullermi taamaalissasoq eqqoriarneqarsinnaavoq, Erik Sivertsen oqarpoq.
Pisassat amerlissanngitsut
Qeqertarsuup Tunuani umiatsiaararsortunut 2013-imi ukiumoortumik pisassiisoqarmat, juulip naanerani taakkua taamani pisassaarupput. Ukiulli sinneranut pisassat taamani ilaneqarput.
Tamannali aappaagu pissanngitsoq, tassa pisassanik ilaseqqittoqassanngitsoq Naalakkersuisut maanna aalajangerput.
- Naalakkersuisut aalajangerput ukiup ingerlanerani pisassiissutinik ilasisoqartassanngitsoq, Naalakkersuisut tusagassiuutinut allapput.
AAMMA ATUARUK Saarullinnik, qeeqqanik suluppaakkanilluunniit aalisarniaritsi!
Qaleralittassalli ukiup sinneranut naammakkunnaariartortutut nalilerneqarpata, aggustip qaammataanit pisassat sinneruttut, qaammatikkaartumik agguaanneqarsinnaassasut, aalisarnermut naalakkersuisoqarfik allappoq.
- Naalakkersuisut ukiup sinneranut aalisarnissaq qulakkeerumallugu, aggustip aallaqqaataanit ukiup sinneranut qaammammut qaleralittassiisinnaassapput, Naalakkersuisut allapput.
Sulisunut kingunerlussinnaasoq
Tunisassiorfik ukioq suli naanngitsoq qaleralinnik tunisassiornikillissaguni sulisunik sulititsiinnarsinnaassanngilaq. Tamanna suliffeqarfimmuinnaq eqquinerlunnani aamma sulisunut aalajaattunut kingunipiloqarsinnaasoq, pisortaq naliliivoq.
- Taanna arlalitsigut aamma unammillernassooq. Sulisoqarniarneq eqqarsaatigalugu, sulisut ataavartumik sulitissinnaasaraluagut sulisinnaajunnaassammata.
- Taavalu taakkua sulisorisagut aalajaattut pikkorissut suliffeqarfinnut allanut nooralissallutik, Erik Sivertsen oqarpoq.
AAMMA ATUARUK Sinerissap qanittuani aappaagumut qaleralittassiissutit ilaneqassanngitsut
Pisassat qaammatikkaartumik killilersorneqarnerat ukiumoortunngoraluartoq, tamanna tunisassiorfimmut immini ajornartorsiortitsilertariaqanngilaq. Pisassalli oqilinerat tunisassiorfiup kaaviiartitaanut sunniuteqarsinnaavoq.