Saarullinnik, qeeqqanik suluppaakkanilluunniit aalisarniaritsi!

Qeqertarsuup Tunuani aningaasarsiorfiulluartumik qaleralinniarnerup ippassaq uninnerata kingorna, Aalisarnermut Piniarnermullu Naalakkersuisoq umiatsiaararsorlutik aalisartunut ullumi taama kaammattuuteqarpoq.
Allattoq Karsten Sommer, Simon Uldum
aggustip 02-at 2013 05:57

Ukiumoortumik pisassiissutit ippassaq tamakkerneqarput, maannalu angallatit meterit arfinillit sinnerlugit takissuteqartut  kisimik suli qaleralittassaqarlutik.

Qeqertarsuup Tunuani qaleralinniarnerup unitsinneqarneranut atatillugu Karl Lyberthip oqaatigaa, aalisartut ukioq kaajallallugu aalisarsinnaanissaannut periarfissikkusullugit, maannakkutut ukiumoortumik pisassiissutigineqartut ukioq taamaaliinnartoq nungunneqartarunnaarsillugit.

Tamanna ilaatigut qaammatit pingasukkuutaarlugit pisassiisarnerup, Naalakkersuisut siuliisa eqqussaat maannali naalakkersuisuusut maajimi juunimilu atorunnaarsitaasa eqquteqqinneqarnerisigut pisissaavoq.

Qaammatit pingasukkuutaarlugit pisassiissarnerup eqquteqqinneqarnissaa aalisartut piniartullu kattuffiannit KNAPK-mit taperserneqarpoq, KNAPK-mi pisortaq Petrus Biilmannn aviisimut Sermitsiamut, ullumi saqqummersumut oqarpoq.

- Maanna Naalakkersuisuusunit atorunnaarsinneqarmata ajuusaarutigaarput, aviisimut oqarpoq.

Karl Lyberthilli tamatuma aalajangiiffigineqarnissaata tungaanut aalisartut aalisakkanik allanik aalisarnissaannik kaammattuivoq.

- Aalisakkat assigiinngitsut atorluarneqarnerunissaat kissaatigaarput, soorlu assersuutigalugit saarullit, qeeqqat suluppaakkallu, Karl Lyberth tusagassiorfinnut nalunaaruteqarluni taama oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk