Aqqaluaq: Allaffissorpallaarneq tunngaviuvoq

Sinerissap qanittuani umiatsiaararsortunut qaleralittassiissutit qaammatikkaarunnaarlugit ukiumoortunngortinneqarneranni, allaffissorpallaarneq tunngaviunerpaasoq, aalisarnermut naalakkersuisoq oqarpoq.

- Qaammatikkaartumik pisassiisarunnaarnerup tunngavippiarivaa, allaffissornermik annertoorujussuarmik pilersitsigami.

- Qaammammiit qaammammut nuussisaqattaarnermi annertuumik ingerlatsiviusutut misilittagaqarfigineqalereermat allannguisariaqalerneq pisariaqalersimavoq, Aqqaluaq B. Egede oqarpoq.

Qeqertarsuup Tunuani umiatsiaaqqamik qaleralinniat 2013-mi ukiumut pisassinneqaramik, tamaasa juulip qaammataani qaqippaat. Aappagu taamak pisoqarpat ilasisoqassanngitsoq, Naalakkersuisut pisassassanik saqqummiussinerminni allapput.

Tiguussaasumik pilersaaruteqanngilaq

Pisassat aappaagu ukioq suli naanngitsoq nunngussappata tiguussaasumik qanoq iliornissaq naalakkersuisup akisinnaanngilaa.

- Ukiup tullia takulaartigu, taava aalisarnerup qanoq inissisimanera aallaavigalugu naleqqussaaqqinnissatsinnut Naalakkersuisutut imminut pisinnaatitaaffilernerput taanna suliarissavarput, Aqqaluaq B. Egede oqarpoq.

Naalakkersuisup ukioq qanoq aalisarfiussanersoq takoqqaarusukkaa ulluinnarni aalisarnermik tunisassiornermillu inuussutissarsiutillit ernumanerupput.

AAMMA ATUARUK Ilulissani aalisartoq: Ukiumut pisassat aasaru nungussuagut

Aalisartut sukannersumik aqunneqarunnaarlutik ukiumut pisassanik paggatilerpata pisassiissutinik nunguutsiaarnissaq ilimanartoq, tunisassiorfimmi Halibut Greenlandimi pisortaq, Erik Sivertsen ataasinngormat oqarpoq.

Tamannalumi aamma Ilulissani umiatsiaararsortumit qularineqanngilaq.

- Aasarisseruttortoq nunguutsinissarput qularnanngilaq, Knud Markussen KNR-mut marlunngormat oqarpoq.

Qeqertarsuup Tunuani umiatsiaaqqamik qaleralinnianut pisassiissutit aappaagumut 4252 tonsiupput.