Naalakkersuisoq erseqqissumik suli isumminngitsoq
Aalisarnermut naalakkersuisup, Siumumeersup, Karl Tobiassenip, Ilulissani qalerallit tulaassat siullermik alliartornerariarlugit ullut 20-nngitsut qaangiuttut milliartorneralerpai. Tassalu imminut assortuuttumik oqaaseqarpoq.
Tamanna Inatsisartunut ilaasortanit, Hans Enoksenimit (N), Jens-Frederik Nielsenimillu (D) aalisartullu kattuffiinit marlunnit, SQAPK-mit KNAPK-miillu paatsiveerusimaarutaavoq.
Qalerallit angissusaat
Qeqertarsuup Tunuani qalerallit Pinngortitaleriffimmi milliartortut Pinngortitaleriffimmit oqaatigineqarpoq
Tamaani aalisakkat anginerusut qaqutigoornerusumik pisarineqartalersut, 2019-imi 2020-milu misissuisoqarnerani paasineqarpoq.
Qalerallit 2019-imi pisarineqartunit agguaqatigiissillugu 50 centimeterinit anginerupput, ukiulli ingerlanerini qalerallit 50 centimeterit angunaguluunniit angissuseqalersimapput.
Qalerallit tunineqartartut ukiut aqqaneq marluk matuma siorna agguaqatigiisillugu 57 centimeterinik angissuseqartarput.
Qalerallit ukiut 20-t matuma siorna aasaanerani ningittakkanik pisarineqartartut anginerungaatsiarput. Taamani agguaqatigiisillugu 664 centimeterisut angissuseqarput, tassa ukiut 20-t ingerlaneranni 14 centimeterinik mikinerulerput.
Taakkuami naalakkersuisup Ilulissani qalerallit angissusaat pillugu qanorpiaq isumaqarnera paaserusullugu KNR-mut siusinnerusukkut oqarput.
AAMMA ATUARUK Naalakkersuisoq isummaminik allanngortitsisoq: Pinngortitaleriffik tamakkiisumik uppernassuseqarpoq
Naalakkersuisorlu KNR-mit aperaarput:
Illit naalakkersuisutut isumaqarpit qalerallit Ilulissani alliartortut imaluunniit millingaluttuinnartut?
- Biologit oqarput millingaluttuinnartut. Aamma taanna naqissuserpara, assortunnginnakku. Aamma erseqqissarpara illua-tungerluinnaanik allatut oqariartortoqartartoq, aalisartut naalakkersuisuat, Karl Tobiassen, KNR-mit apersorneqarluni tallimanngormat taama oqarpoq.
Nammineq naliliinngitsoq
Tassalu taassuma allat naliliinerat issuarpaa, namminerpiarli naalakkersuisutut qanoq naliliinerluni akinngilaa.
Taamaammat KNR-p apereqqippaa:
Paasinnginnakku apeqqutigeqqikkiga. Illit naalakkersuisutummita qanoq isumaqarpit?
- Erseqqissaatigereerpata apeqqutinut taakkununnga qanoq isumaqarnerlunga, Karl Tobiassen oqarpoq.
AAMMA ATUARUK Jens-Frederik: Naalakkersuisut qanoq isumaqavinnersut paaserusunnarsivoq
KNR erseqqissaataasinnaasunik suli apeqqutissaqaraluatoq, naalakkersuisoq apersorneqarnissaminut piffissaaruppoq.
KNR-p naalakkersuisoq apersoqqikkusullugu attaveqarfigaa, sulili akissutissarsinani.
