Jens-Frederik: Naalakkersuisut qanoq isumaqavinnersut paaserusunnarsivoq
- Paasissutissaq eqqortoq aninneqartariaqarpoq, naalakkersuisoq aamma toqqortissanngilaq. Isummanni saqqummiuttariaqarpaa.
Demokraatit siulittaasuat, Inatsisartunullu ilaasortaq, Jens-Frederik Nielsen KNR-mut oqarpoq.
AAMMA ATUARUK Naalakkersuisoq isummaminik allanngortitsisoq: Pinngortitaleriffik tamakkiisumik uppernassuseqarpoq
Aalisarnermut naalakkersuisup, Siumumeersup, Karl Tobiassenip, Ilulissani qalerallit tulaassat siullermik alliartornerariarlugit ullut 20-nngitsut qaangiuttut milliartorneralerpai. Tassalu imminut assortuuttumik oqaaseqarpoq.
Qalerallit angissusaat
Qeqertarsuup Tunuani qalerallit Pinngortitaleriffimmi milliartortut Pinngortitaleriffimmit oqaatigineqarpoq
Tamaani aalisakkat anginerusut qaqutigoornerusumik pisarineqartalersut, 2019-imi 2020-milu misissuisoqarnerani paasineqarpoq.
Qalerallit 2019-imi pisarineqartunit agguaqatigiissillugu 50 centimeterinit anginerupput, ukiulli ingerlanerini qalerallit 50 centimeterit angunaguluunniit angissuseqalersimapput.
Qalerallit tunineqartartut ukiut aqqaneq marluk matuma siorna agguaqatigiisillugu 57 centimeterinik angissuseqartarput.
Qalerallit ukiut 20-t matuma siorna aasaanerani ningittakkanik pisarineqartartut anginerungaatsiarput. Taamani agguaqatigiisillugu 664 centimeterisut angissuseqarput, tassa ukiut 20-t ingerlaneranni 14 centimeterinik mikinerulerput.
- Pissusissamisuunngilaq paasissutissat taamak imminut ungasitsingisut assigiinngitsigisullu marluk taamatut apuunneqartut. Naalakkersuisutut pisussaaffigivaa eqqortumik oqalunnissani.
Paaserusuisut arlallit
Inatsisartunut ilaasortap, Naleqqallu siulittaasuata, Hans Enoksenip, naalakkersuisoq taamungaannaq oqalunnerarlugu qanorpiarlu isumaqavinnera paaserusullugu KNR-mut siusinnerusukkut oqaatigaa.
- Paasissutissat illuanut sammigamik tamarmik. Naalakkersuisoq oqariartorpoq qalerallit alligaluttuinnartut taavalu naalakkersuisoqarfia qalerallit millingaluttuinnartut. Tassani kukkuneq ersarissorujussuuvoq, Hans Enoksen oqarpoq
Taanna naalakkersuisup isumaanik ersarissumik paasinnikkusuttuni kisiartaanngilaq. Sinerissap qanittuani aalisartut sinniisaasa, tassa kattuffiisa marluk, KNAPK-p, SQAPK-llu naalakkersuisup qalerallit angissusaanut isumaa ersarissoq aamma paaserusullugu KNR-mut siusinnerusukkut oqarput.
AAMMA ATUARUK Aalisartut kattuffii: Naalakkersuisoq namminerpiaq qanoq isumaqarpit?
Naalakkersuisorli suli isummaminik ersarissumik nalunaaruteqanngimmat paasinnikkusuttut ikiliartunngillat.
- Eqqortumik oqaluttariaqarpoq. Naalakkersuisut qanoq isumaqavinnersut paaserusunnarsivoq. Maanakkullumi naluarput naalakkersuisoq isumaqarnersoq qaleralik milliartornersoq imaluunniit alliartornersoq, Jens-Frederik Nielsen oqarpoq.