Naalakkersuisoq isummaminik allanngortitsisoq: Pinngortitaleriffik tamakkiisumik uppernassuseqarpoq
Aalisartut naalakkersuisuata, Siumumeersup Karl Tobiassenip, Pinngortitaleriffimmi ilisimatusartut qalerallit angissusaat pillugit misissuineri tamakkiisumik uppernassuseqartutut maanna nalilerpai.
- Pinngortitaleriffiup ilisimatuussutsikkut misissuineri tamakkiisumik uppernassuseqartut erseqqissarusuppakka, Karl Tobiassen, Inatsisartunut ilaasortamut, Naleqqameersumut, Hans Enoksenimut akissuteqarnermini allappoq nangipporlu:
- Taamaattumik qalerallit pisarineqartut agguaqatigiissillugu angissusii mikinerulersimasut Naalakkersuisut uppernarsarsinnaavaat.
Akerlianik oqartoq
Taannali KNR-mut apriilip 19-ani maanna akissutimi illua-tungerluinnaanik oqarpoq.
Aningaasaqarnermut ataatsimiititaliap tunitsivinnit paasissutissinneqarnera innersuussutigalugu qalerallit Ilulissani tulaanneqartartut alliartortut Karl Tobiassen qaammataanngitsup matuma siornatigut oqarpoq.
AAMMA ATUARUK Naalakkersuisunngorlaaq: Ilulissani qalerallit milliartunngillat
KNR-ip ilanngutassiaa apriilip ulluisa 19-ianni saqqummerpoq. Karl Tobiassenilu apriilip ulluisa 22-anni tusagassiuutinut nalunaaruteqarluni qisuariarpoq.
Apersorneqarnermini "biologit killormut oqariartornerat ilanngullugu ilisimaaralugu"-mik oqarsimanerarluni tassani allappoq. Tamatumalu ilanngunneqarsimannginnera ajuusaarnartuusoq oqarluni. Aamma KNR-imut akissutaa naalisarneqarsimasoq Hans Enoksenimut akissummini allapoq.
Tamannalumi ilumoorpoq.
KNR-ip ilanngutassiaani ima issuarneqarpoq:
- Inatsisartut aningaasaqarnermut ataatsimiititaliaa angalaqatigalugu tunitsiviit ilaanniit saqqummiivigineqarpugut Ilulissani ukiut kingulliit tulaattakkat alliartortut,
Akissutaatalu sinnera, KNR-imiit taamani ilanngutinngisarput imaappoq:
- Naak biologit oqariartoraluartut illuatungaani, qalerallit tulaattakkat milliartuinnarput. Kisianni nunami suliffissuarni tulaanneqartartut suliarineqartartut kisitsisaatigineqarput, alliartortut. Taamaammat tamakkua aamma ataqatigiissinnissaaq pingaarutilerujussuuvoq. Uani illuatungaannaanut tusaaniarluta aalajangersaagaluarutta illuatungaannarsiussaagut.
AAMMA ATUARUK Naalakkersuisunngortoq: Uumassusilerituut aalisartullu siunnersuutigisaat naligiissaarlugit pisassiissuteqartoqassaaq
Karl Tobiassen aalisartut aalisarnermut inatsimmi peqataatinneqarnissaasa pingaassusaannik tunngaviulersuilluni apriilip 19-anni oqarpoq.
Tassalu naalakkersuisup Hans Enoksenimut akissuteqarnermini KNR-imiillu apersorneqarnermini isumaa mumingalluinnarpoq.
KNR-ip naalakkersuisoq tamanna pillugu apersorusullugu attaveqarfigigaluarpaa, sulili iluatitsinani.
