Ilisimatusartut Qeqertarsuup Tunuani qalerallit 2019-mi 2020-milu aalisartunit tulaassat nalunaarsugaat naapertorlugit, tamaani qalerallit milliartuinnavipput. Assi: Ane-Marie Petersen/KNR

Naalakkersuisunngorlaaq: Ilulissani qalerallit milliartunngillat

Aalisarnernut naalakkersuisup, Karl Tobiassenip qalerallit alliartortut oqarpoq. Uumarsorsiuulli nalunaarsugaat illua-tungerluinnaanik inerneqarput.

Aalisartut uumasorsiuullu qalerallip avannaani angissusaa pillugu ukiorpassuarni oqallittarput.

Uumasorsiuut misissuinerisa inernerisa pisaasartut milliartuinnarnerat takutittarpaa. Aalisartulli qalerallip angissusaa nikinngitsoq anginerulertutulluunniit naliliikkajupput.

Aalisarnermut naalakkersuisunngorlaaq, Karl Tobiassen (S) taannarpiaq pillugu maanna isummerpoq: 

- Inatsisartut aningaasaqarnermut ataatsimiititaliaa angalaqatigalugu tunitsiviit ilaanniit saqqummiivigineqarpugut Ilulissani ukiut kingulliit tulaattakkat alliartortut.

Aalisarnermut naalakkersuisunngorlaaq, Siumumeersoq, Karl Tobiassen qalerallit pillugit KNR-mut taama oqarpoq.

Taassuma Ilulissani tunisassiorfinnut qalerallit tulaassat, naalakkersuisunngunngitsiarluni Inatsisartunut ilaasortatut Ilulissaniinnermini qaammat kingulleq takusimallugit oqarpoq.

Ilulissani aalisakkanik tunisassiorfiup namminersortup, Halibut Greenlndip, tunisassiorfimmi pisortaata Pele Peter Aronsenip, paasissutissat Inatsisartut ataatsimiititaliaannut ilaasortanut saqqummiunneqarsimasut KNR-mut uppernarsarpaa.

Suliffeqarfiup qalerallit imminerminnut tulaanneqartut alliartuinnarnerarpai. Tassanngaanniilli taamaanneraanerminnut uppernarsaatinik takutitserusunngillat.

Taakkua nalunaarsugaat, uumasorsiuut Pinngortitaleriffimmeersut misissugaannut naapertuutinngillat.

50 centimeterimit mikinerusut

Ilisimatusartut Qeqertarsuup Tunuani qalerallit 2019-mi 2020-milu aalisartunit tulaassat nalunaarsugaat naapertorlugit, tamaani qalerallit milliartuinnavipput. Qalerallimmi agguaqatigiisillugu 2019-mi 50 centimeterimit anginerugaluarlutik 2020-mi 50 centimeterimit mikinerulerput.

Ukiulli siuliini anginerusimapput. Pinngortitaleriffiummi Qeqertarsuup Tunuani 2010-mi nalunaarsugai naapertorlugit, qalerallit tulaassat agguaqatigiisillugu taamani 57 centimeterimit anginerupput.

14 centimeterimik millisut

Qalerallit ukiut 20-it matuma siorna aasakkut ningittakkanik pisat suli anginerullutik 64 centimeteriupput. Taamaalilluni ukiuni kingullerni 20-ni agguaqatigiissitat naapertorlugit, taakkua centimeterinik 14-nik millipput.

KNR-p Pinngortitaleriffik attaveqarfigaa, taakkuali Naalakkersuisup oqaasii akissuteqarfigerusunngilaat.

Pinngortitaleriffimmiilli erseqqissaapput, qalerallit Qeqertarsuup Tunuani ukiup aallartinnerani anginerusartut. Ukiummi aallartinnerani Ilulissat Kangerluanni aalisartoqarnerani qalerallit angisuut pisarineqartarput.

Ukiuunerani qassusersornermi ningartat angissussaat peqqutaalluni qalerallit mikinerusut pisarineqarnerneq ajortut tassanngaanniit erseqqissaapput.

- Taamaattumik januaarimi februaarimilu tulaassat angissusaat ukiut siuliinut, aamma aasakkut qalerallit mikineruneranni paasissutissanut sanillersuunneqarsinnaanngillat, Pinngortitaleriffik allakkatigut akissummini ilaatigut taama allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl