KNAPK-p Karl Tobiassenip Ilulissani qalerallit angissusaat pillugu assigiinngitsumik oqarnera naammangisimaanngilaa. Assi: Malik Brøns / KNR

Aalisartut kattuffii: Naalakkersuisoq namminerpiaq qanoq isumaqarpit?

Aalisarnermut naalakkersuisup qalerallit angissusai pillugit imminut assortuuttumik oqarnera aalisartut kattuffiisa marluk imaannaanngitsutut nalilerpaat.

- Naalakkersuisup oqaasii qaammatip ataatsip ingerlaneriinnaani mumilluinnarput. Toqqisisimananngilaq.

SQAPK-p pisortaa, Erik Lange KNR-mut oqarpoq.

Aalisarnermut naalakkersuisup, Karl Tobiassenip (S), Ilulissani qalerallit tulaassat agguaqatigiisikkaanni KNR-mut apriilip 21-ani alliartornerarpai. Ilulissani qaleralinnik tunisassiorfimmi saqqummiisoqarmat tusakkani tamatumunnga taamani tunngavilersuutigai.

AAMMA ATUARUK Naalakkersuisoq isummaminik allanngortitsisoq: Pinngortitaleriffik tamakkiisumik uppernassuseqarpoq

Kisianni ullut 20-nngitsut qaangiummata taakkua milliartortutut nalilerlugit Inatsisartunut ilaasortamut, Hans Enoksenimut allappoq.

Qalerallit angissusaat

Qeqertarsuup Tunuani qalerallit Pinngortitaleriffimmi milliartortut Pinngortitaleriffimmit oqaatigineqarpoq

 

Tamaani aalisakkat anginerusut qaqutigoornerusumik pisarineqartalersut, 2019-imi 2020-milu misissuisoqarnerani paasineqarpoq.

 

Qalerallit 2019-imi pisarineqartunit agguaqatigiissillugu 50 centimeterinit anginerupput, ukiulli ingerlanerini qalerallit 50 centimeterit angunaguluunniit angissuseqalersimapput.

 

Qalerallit tunineqartartut ukiut aqqaneq marluk matuma siorna agguaqatigiisillugu 57 centimeterinik angissuseqartarput.

 

Qalerallit ukiut 20-t matuma siorna aasaanerani ningittakkanik pisarineqartartut anginerungaatsiarput. Taamani agguaqatigiisillugu 664 centimeterisut angissuseqarput, tassa ukiut 20-t ingerlaneranni 14 centimeterinik mikinerulerput.

Tassalu imminut assortuuttumik oqaaseqarpoq.

KNAPK: Imaannaanngilaq

Pinngortitaleriffiup, ilisimatuussutsimik tunngaveqartumik qaleraleqassutsimik naliliisartup, misissuineri tamakkiisumik uppernassuseqartut tamatumuuna oqarpoq.

- Uani taamatut oqartoqarsimanera piffissami sivikitsumi imaannanngittorujussuuvoq aamma tamanut, tamatsinnut. Aamma naalakkersuisutut sulinermi.

AAMMA ATUARUK Hans Enoksen: Naalakkersuisoq taamungaannaq oqaluppoq

KNAPK-p siulittaasua, Nikkulaat Jeremiassen oqarpoq. Taassuma naalakkersuisup imminut assortuuttumik oqalunnera ilaasortami uggorigaat aamma oqaluttuaraa.

Taassuma naalakkersuisup imminut assortuuttumik oqaaseqarnera inuussutissarsiummut nunamut pingaaruteqaqisumut attanneqarsinnaanersoq attanneqarsinnaannginnersorluunniit oqaaseqarfigiumanngilaa.

Inuiaqatigiinnut nassuiaaqqusaasoq

SQAPK-p pisortaata aalisarnermut naalakkersuisup oqaasiisa assigiinnginnerat naammangisimaanngilaa. Naalakkersuisullu namminerpiaq qanoq isumaqarnerluni paasitittariaqaleraa isumaqarpoq.

- Piviusoq inuiaqatigiinnut saqqummiuttariaqarpaa imminut assortuuttumik saqqummiussinani. Nammineq isumarpiani naalakkersuisutut annittariaqalerpaa massakkut, Erik Lange oqarpoq.

Pisoq assinngusoq

KNAPK-p siulittaasua, Nikkulaat Jeremiassen aalisarnermut siornatigut naalakkersuisuuvoq.

Taanna maanna suliamut assingusumik taamani iliorpoq. Tassami Nuup Kangerluani qaleralinniarfiit ilaanni qaleralinnik aalisapiluttoqarnerarlugu, Inatsisartunut taamani ilaasortap, Sofia Geislerip (IA) apeqquteqaataanut 2019-imi marsimi akissuteqarluni allappoq.

AAMMA ATUARUK Atassut naalakkersuisoqatigiinnit tunuarpoq, Jeremiassenilu naalakkersuisutut aamma tunuarluni

Tassani Nuummut tulaanneqartartut 2010-miit 2017 2018-imut agguaqatigiissillugit 8 centimeterimik milleriarsimasut innersuussutigai.

Taanna KNR-mut imminnut assortuuttumik 2019-mi apriilip sisamaanni oqaaseqarpoq.

- Paragraf 37-imi akissuteqaatit aallaavigalugit kisitsisit toqqammavigalugit ilaatigut taamatut paasineqarsinnaasumik inissittoqarsinnaavoq. Kisianni taanna erseqqissassuara nammineerlunga oqarsimanngisaannarama aalisapiluttoqartoq, Nikkulaat Jeremiassen oqarpoq.

AAMMA ATUARUK Nikkulaat Jeremiassen isornartorsiuisoqarneranut akissuteqartoq

Tamatumalu malitsingisaanik aalisarnermut naalakkersuisutut tunuarpoq.

KNR-p aalisarnermut naalakkersuisoq, Karl Tobiassen, imminut assortuuttumik oqaaseqarnera pillugu apersorusullugu pingasoriarluni attaveqarfigigaluarpaa, taassumali naalakkersuisoqarfianiik suli akisoqanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl