Hans Enoksen: Naalakkersuisoq taamungaannaq oqaluppoq
- Taamungaannaq oqaluttoqarpoq Naalakkersuisuninngaanniit, Hans Enoksen oqarpoq.
Aalisarnermut naalakkersuisoq, Siumumeersoq Karl Tobiassen, qalerallit Ilulissani tulaanneqartut angissusaannut kisitsisit Inatsisartut aningaasaqarnermut ataatsimiititaliaannut saqqummiunneqarsimasut innersuussutigalugit qalerallit alliartortut KNR-imit apriilimi apersorneqarnermini oqarpoq.
AAMMA ATUARUK Naalakkersuisoq isummaminik allanngortitsisoq: Pinngortitaleriffik tamakkiisumik uppernassuseqarpoq
Pinngortitaleriffiulli ilisimatuussutsikkut misissuineri tamakkiisumik uppernassuseqartut Hans Enoksenip apeqqutaanut maajip aallartinnerani akissuteqarluni allappoq.
Tassanngaanniillu qalerallit milliartornerarlugit inerniliinerat suli atuuppoq.
Itisiliinngitsoq
Naalakkersuisup qalerallit angissusiat pillugu oqaaseqarnera KNR-imit kingornatigut naalisarneqarsimasoq ilanngullugu allappoq. Qanoq naalisarneqarsimanersoq Inatsisartunut ilaasortamut allanngilaq.
Tusagassiuutinulli apriilimi nalunaarummini oqaaseqarneruvoq.
Biologit nalunaarsugaat upperalugit tassani allappoq. ”Biologit killormut oqariartornerat ilanngullugu ilisimaaralugu” KNR-imut oqarsimanerarpoq, taamalu oqarnera ilanngunneqarsimanngitsoq allaluni.
AAMMA ATUARUK Naalakkersuisunngorlaaq: Ilulissani qalerallit milliartunngillat
KNR-imiilli apersorneqarnermini oqarpoq, qalerallit milliartortut biologinit oqaatigineqaraluartoq, qalerallit alliartortut kisitsisinit takutinneqartoq. Tamannalu politikkikkut sulinermi ilaanngunneqartariaqartoq, apersorneqarnermini nangilluni oqarpoq.
Enoksen: Paasissutissat illuanut sammipput
Naalakkersuisullu KNR-imut oqaasiisa kingornalu nalunaarutaasa isumaat assigiinngilluinnartut, Hans Enoksen oqarpoq.
- Paasissutissat illuanut sammigamik tamarmik. Naalakkersuisoq oqariartorpoq qalerallit alligaluttuinnartut taavalu naalakkersuisoqarfia qalerallit millingaluttuinnartut. Tassani kukkuneq ersarissorujussuuvoq, Hans Enoksen oqarpoq.
AAMMA ATUARUK Naalakkersuisunngortoq: Uumassusilerituut aalisartullu siunnersuutigisaat naligiissaarlugit pisassiissuteqartoqassaaq
Taanna Inatsisartuni aalisarnermut ataatsimiititaliami ilaasortaavoq. Naalakkersuisullu oqaasii taama assigiinngitsigitillugit ataatsimiititaliaq aqqutigalugu naalakkersuisumit maanna nassuiaaffigineqarusuppoq.
Uppernarsaatinik noqqaaniartoq
Naalakkersuisup qalerallit alliartornerannik oqarneranut suut uppernarsaataanersut takorusuppai.
- Taava tamakkiisumik uppernarsissagutsigu paasissutissat pisortatigoortumik tamaasa ataatsimiititaliamut tunniuttariaqarpaat.
Hans Enoksen taama piumasaqarnini pillugu ima tunngavilersuivoq:
- Uanga takunikuunnginnama qalerallit alligaluttuinnartut, Hans Enoksen oqarpoq.
KNR-mit aalisarnermut naalakkersuisup, Karl Tobiassenip isumaata muminnera, Hans Enoksenillu isornartorsiutai pillugit apersorusullugu attaveqarfigisaraluarpaa, sulili akissutissarsinani.