QIMMIT NAPPAATAAT Qaasuitsup Kommunia akiuussutissaasiveqalerpoq

Qimmit nappaataat Qeqertami Ilulissanilu qimmit 300-t missaaniittunut toqqutaasimavoq, ilaatigut qimmit piginnittuisa akiuussutissamik kapitinnissaannik isumaginnissimannginnerat aammali naammattunik akiuussutissaqarsimannginnera pisuuvoq. Qaasuitsup Kommuniata tamanna ilinniutigaa uumasullu nakorsaa piffissap ilaannaani sulisartoq kisimi akiuussutissaateqartarsimagaluartoq maanna allannguinikkut allani aamma akiuussutissaqalerpoq.

- Immikkut ittumik pequusivimmik qimminut akiuussutissanut atorneqartussamik ammaavugut. Taamaasilluta akiuussutissanik amigaateqarfiusuni nunaqarfinnut illoqarfinnullu sukkasuumik nassiusisinnaaniassagatta.

- Siornatigornit eqeersimaarneruvugut maanna, Jens Mikkelsen Qaasuitsup Kommuniani sanaartornermut avatangiisinullu immikkoortortami pisortaq KNR-imut oqarpoq.

Aamma atuaruk Ilulissani qimmit akiuussutissaqaqqilerput

Aamma atuaruk Nunaqarfinni Saqqami Qeqertanilu qimminik mattussineq atorunnaarpoq

Taamaasilluni qimmit nappaataannut akiuussutissat illoqarfinnut arfineq-pingasunut nunaqarfinnullu 31-nut nassiuttariaannanngorput.

- Inniminniisoqarpat maanngaanniit nassiussisinnaanissatsinnut piareeqqavugut. Silali taamaallaat naalagaavoq qaqugu soorlu Uummannamut apuuttoqarnissaanik, Jens Mikkelsen oqarpoq.

Inatsisartunilu aalajangiisartunut kommunimit kajumissaaruteqarput.

- Sakkortuumik inassutigerusupparput qimmit napparsimalinnginnissaannut akiuussutissanik kapisisarnerup inatsisit malillugit pisussaaffiulernissaa. Ajunaarnersuartut ittumik misigisaqaqqissanngikkutta.

- Qimuttut inuiaqatigiit kulturiannut pingaaruteqaqaat taamaammat inatsisiliortoqarnissaa pingaaruteqaqaaq, Jens Mikkelsen oqarpoq.

Uumasut nakorsaanerata Sanne Eline Wennerbergip tamanna aamma siunnersuutiginikuaa.