Qaasuitsumi politikeri: Imiuterput tillippaat
Kristian Broberg, Siumut, oqaluttuarpoq Greenland Invest ApS-ip, Jørgen Wæver Johansenimit Svend Hardenbergimillu ingerlanneqartup, Qeqertarsuarmit imermik annissuinera illoqarfimmi suliffissaqartitsinngimmat innuttaasut aalassasimaaqisut.
- Qeqertarsuarmiut Qeqertarsuup imia pitsassuaq nunaqqatitsinnit nunarsuarmioqatitsinnillu imerneqarnissaa soqutigilluinnaqqissaarpaat, Qaasuitsup Kommuniani Siumut sinnerlugu ilaasortaq Kristian Broberg KNR-imut oqarpoq.
- Taamaattorli massakkut imeq suliffissamik ataasinnguamilluunniit pilersitsinani annissuinnarneqarnera akuerisinnaanngilluinnaqqissaarparput.
- Massakkut imeq tankersuarnut immiussuutiinnariarlugu Nuuliaassorneqarpoq, tassanilu maqinneqarlunilu puiaasanut immiussorneqarluni.
Aamma atuaruk Imivik tunisaasinnaanngortoq
Suliffiit pioreersut suleqatigineqartut
Svend Hardenberg, Greenland Investimi siulittaasoq, oqaluttuarpoq Imivik suliffeqarfiit allat suleqatigalugit pilersinneqartoq. Tassulu Nukissiorfiit erngup Uunartuarsummit maqinneqarnissaa isumagivaa. Maskinværkstedet ApS-ip tankersuit imermik immertarpai. Kiisalu Nuuk Imermi imeq puiaasanut immiunneqartarluni.
- Qeqertarsuarmi Nukissiorfinni Maskinværkstedimilu suliaqartitsivugut, Nuuk Imermilu suliassaqartitsilluta. Taakkulu saniatigut Royal Arctic Line aqqutigalugu nassiussuilluta, Hardenberg KNR-imut oqaluttuarpoq.
- Taamaammat inuiaqatigiinnut aningaasarpassuarnik kaaviaartitsivugut. Taamaaliornikkut tamattaalluta nuannaarutissatsinnik nioqqutissamik pilersitseqatigiinnissarput qulakkeerparput.
Aningaasanik kaaviaartitsisinnaasoq
Inatsisartuni amerlanerussuteqartut akuersereerneranni imeq nunatsinnut eqqunneqartoq akitsuuserneqa juunip aallaqqaataani akitsuuserneqartalerpoq.
Tamannalu isumaqarsinnaavoq pisiniarfiit imermik Nunatsinneersumik piserusunnerulissasut. Taamaassappallu aningaasat nunatsinit anisartut akilisinnaallutik.
Tamannali Kristian Brobergip naammaginngilaa. Suliffiimmi pioreersut atorneqarmata nutaanillu pilersitsisoqarani.
- Ajunngilaq tunisassiarineqarniarli. Kisianni Qeqertarsuarmut minnerunngitsumillu Qaasuitsup Kommunianut ataavartunik suliffissaqartitsisinnaasuuguni nuannernerpaassagaluarpoq.
Kristian Brobergip oqaatigaa Qeqertarsuarmi suliffissaaleqisut 100-t angusinnaasarai, taamaammallu Imiviup suliffissaqartitsinnginnerata uumisuutigineqarnera paasisinnaalluarlugu. Innuttaasullu oqallinnerini oqariartuutit sakkortusinnaasarsimasut oqaatigalugu.
Erngup Uunartuarsummeersup suliffissaqartitsinani annissorneqarnera tillinnertut oqaatigisariaqartoq innuttaasut oqariartuutigisarsimagaat, Kristian Broberg KNR-imut nassuiaavoq.
AAMMA ATUARUK Hardenberg Wæverilu Qeqertarsuup ernganik tunisassiortunngussapput
