Hardenberg Wæverilu Qeqertarsuup ernganik tunisassiortunngussapput
Naalakkersuisut Siulittaasuata naalakkersuisoqarfiani pisortaasimasoq Svend Hardenberg Kommune Kujalliullu borgmesteria Jørgen Wæver Johansen Qeqertarsuarmi Uunartuarsuup puilasuaniit imermik puiaasamiittumik tunisassiortunngussapput.
- Qeqertarsuup ernga sivisuumik amigaatigisimavarput, imermillu tunisassiornissaq sivisuumi aallartisarniarsimavarput. Kiisami oqaatigisinnaanngorparput, Qeqertarsuup ernganik containerimut maqitseriarluta maanna Nuummukaassititsigatta, tassanilu puiaasat immerneqartussanngussallutik, Greenland Investimi siulersuisuni siulittaasoq Svend Hardenberg oqarpoq.
Aamma atuaruk Aviisi: Imermik puilasumeersumik tunisassiorneq iluatsinngitsoorpoq
Aamma atuaruk Imermik puilasumeersumik tunisassiorfik nunap sisoorneranit aamma eqqugaavoq
Greenland Invest imermik pilersuisumik nutaamik suliffeqarfiliorpoq, tassanilu imeq tunisassiarineqartussaq Imivik-mik taaguuteqassaaq.
Puilasulli ernga tunisassiarineqassappat minguitsuussaaq. Taava Nuuk Imermit misissorneqaqqaassaaq, taakkualu akuersippata tunisassiorneq aatsaat piviusunngussalluni.
- Imeq minguitsuusoq misissuinerup takutippagu, taava Nuuk Imermi puiaasanut maqinneqarsinnaanngussaaq. Tassalu puiaasat pisiniarfinni assigiinngitsuni juunip aallartinnerani tunisaalernissaat naatsorsuutigaarput.
Puilasup ernga Nuummiinnaagallartoq tunisaalissasoq, puiaasallu utertitap akia tiguneqartassalluni, Svend Hardenbergip oqaatigaa.
