Aviisi: Imermik puilasumeersumik tunisassiorneq iluatsinngitsoorpoq

Qeqertarsuup ernganik pilersaarutigineqartumit annikinnerusumik tunisaqartoqarsimavoq. Aviisi Sermitsiaq taama allaaserisaqarpoq, aviisillu saqqaani Greenland Spring Watersip imermik 938-mik taallugu puiaasaaqqanik avammut nioqqutissiornera ilutsinngitsoortutut taaneqarpoq.
Assi © : KNR/Søren Aadaralak Lyberth
Allattoq Jonas Løvschall-Wedel
apriilip 17-at 2015 08:39

Takorluukkanummi 2009-mi saqqummiunneqartunut naleqqiullugu tunisassiarineqartut annertugisassaanngillat.

Suliffeqarfiup imeq puilasumeersoq 75,5 tonsi siorna tunisassiaraa. Akuersissuteqarnermi isumaqatigiissutaasumi suliffeqarfik imermik puilasumeersumik ukiumut 7.000 tonsinik tunisassiortussaagaluarpoq.

AAMMA ATUARUK Imermik puilasumeersumik tunisassiorfik nunap sisoorneranit aamma eqqugaavoq

 

Iluatsissinnaanera suli upperaat

Inuussutissarsiornermulli, Suliffeqarnermut Niuernermullu naalakkersuisoqarfiup erngup mamarineqaqisup iluatsitsissutigineqarsinnaanera suli isumalluarfigaa.
 
- Greenland Spring Waterimit paasitinneqarpugut maqitsissummik nutaamik ikkussisoqartussanngortoq, tamannalu pereerpat puiaasaaqqanut maqiteraluni tunisassiorneq aallartissinnaassasoq. Suliffeqarfiullu 2015-imi 700.000 literinik tunisassiorsinnaassalluni taggissimagaa, naalakkersuisoqarfimmi pisortaq Jørn Skov Nielsen Sermitsiamut taama allappoq.

Illoqarfimmi suliffissanik pilersitsivallaannginnera aviisimit aamma allaaserineqarpoq. Imeq 75,5 tonsi siorna avammut tunisassiarineqartoq tyskinit sapaatit-akunneri sisamat ingerlanerini tunisassiarneqarpoq. Qeqertarsuarmi ilinniarsimasunik sulisussaqannginnera suliffeqarfiup tamatumunnga pissutaatippaa, aviisi Sermitsiaq taama allappoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk