Imivik tunisaasinnaanngortoq
Nuuk Imermi pisortap, Bernhard Christensenip, erngup minguissusaa misissorneqarsimasoq akuerisaasimasorlu KNR-imut uppernarsarpaa.
Aamma atuaruk Hardenberg Wæverilu Qeqertarsuup ernganik tunisassiortunngussapput
Maannalu Imivik pisiniarfinni tuniniarneqarsinnaalerpoq, Nuummiinnaagallartorli.
- Brugseni Pisiffillu pisiniarlutik nalunaarnikuupput. Nuummi sapaatip akunnerani matumani tuniniagaalissaaq, Svend Hardenberg, Greenland Investimi siulittaasoq, KNR-imut oqarpoq.
- Kingorna illoqarfiit allat quersuinut nassiussorneqassapput. Apeqqutaaginnarpoq qaqugu nassiunneqarsinnaassanersut.
Anguniakkat
Imivik KNI-p peqqumaasivissua aqqutigalugu siammarterneqartassasoq Hardenberg oqarpoq. Tassalu niuertarfinnit tamanit pisiarineqarsinnaassalluni.
- Taamaakkaluartoq soorunami suliffeqarfinnut tuniniaanissamik soqutiginnissinnaasunut pilerisaarutigissavarput, Svend Hardenberg KNR-imut oqarpoq.
Taassuma aamma oqaatigaa Nunatsinni imermik tuniniaanissamik aalajangerneq imermik nioqqutissamik avataanit tikisitsisarnermik millisaanissamik siunertaqartoq.
Avammut niuernianngitsut
Piginneqatigiiffik Greenland Springwater kisimiilluni Qeqertarsuup ernganik avammut tuniniaasinnaatitaavoq, taamaammallu Imivik avammut tunisaasinnaanani. Tamannali ajornartorsiutaanngitsoq Hardenbergip oqaatigaa.
- Nunatsinniinnaq tuniniaasinnaanerput ajorinngilarput, tassami imermik pitsaanerpaamik nioqqutissaateqarluta isumaqaratta, Svend Hardenberg oqarpoq.
Imivik Brugsenimi Pisiffimmilu puua ilanngunnagu 12,95 koruuneqassaaq.
Piffissaq eqqorlugu saqqummertoq
Akitsuut nutaaq atuutileqqammersorlu Imivik saqqummerpoq.
Tassami Inatsisartut upernaakkut ataatsimiinneranni imeq nunatsinnut eqqunneqartoq literimut 1,50 kr.-imik akitsuuserneqarpoq. Taamaalilluni akitsuut tamarmiusoq puiaasanut akitsuut ilanngullugu 25 centiliteri tikillugu imaqarsinnaasunut 3,50 koruuniussalluni, puiaasanullu 25 centiliteri sinnerlugu imaqarsinnaasunut 5 kr.-iussalluni.
Siunnersuut Inatsisartuni amerlanerussuteqartunit akuerineqarpoq. Akitsuut nutaaq juunip aallaqqaataani atuutilerpoq.
Pisiniarfiit imermik akitsuusigaasumik siunissami tikisitsisassanersut imaluunniit Imivik pisiarisassaneraat piffissap takutikkumaarpaa.
AAMMA ATUARUK Aviisi: Imermik puilasumeersumik tunisassiorneq iluatsinngitsoorpoq
AAMMA ATUARUK Imermik puilasumeersumik tunisassiorfik nunap sisoorneranit aamma eqqugaavoq