Politimesteri: Imigassamik atueriaaserput allanngortittariaqarparput
Kalaallit Nunaanni Politiit ukiumoortumik nalunaarutaat marsip sisamaani saqqummerpoq. Nakuusernerit inuit kinguaassiutaannut pinerlunnerit inuiaqatigiinni suli ajornartorsiuterujussuupput. Imigassamik atueriuseq tamatumunnga pissuteqarpoq.
- Peqqummik eqqumaffigisassatsinnik ataatsimik taasissaguma, imigassartoriaaseq ukkatarineqartariaqarpoq, politimesteri Bjørn Tegner Bay oqarpoq, nangipporlu:
- Inuit ajornartorsiuteqarsinnaaneri imigassarlu ajornartorsiutinik pilersitsisartuunngitsoq nalunngilluarpara. Imigassaqarsimanngippat pisut persuttaanermik akuttunerusumik inerneqarsimassagaluartut politiit isaannit takusinnaavarput, taanna oqarpoq.
AAMMA ATUARUK Angerlarsimaffimmi eqqissiviilliornerit imigassamik inerteqquteqarnerup nalaani ikinnerusut
Nakuusernerit 1.348-t 2021-mi nalunaarutigineqarput, tassalu agguaqatigiissillugu nakuusernerit ullormut sisamat nalunaarutigineqarsimapput.
Nunatsinni nakuusernerit Danmarkimut sanilliullugu arfinileriaataasut, Savalimmiunut sanilliullugu 13-eriaataapput.
Nakuusertoqartarneranik ajornartorsiutit iliuuseqarfigissagaanni inuuniarnermikkut ilungersunartorsiortut ukkatarineqartariaqartut, Bjørn Tegner Bay isumaqarpoq.
- Imigassap atugaasarnera inuuniarnikkut atugarliornermik aallaaveqartutut takukkajupparput. Taamaatsillugu imigassaq kukkusumik atorneqartarpoq. Inuiaqatigiittullu ajornartorsiutit iliuuseqarfiginiarutsigit taakkunanngaanniit aallartittariaqarpugut, Bjørn Tegner Bay oqarpoq.
AAMMA ATUARUK Politiit: Imigassartornerulerneq nakuusernerulernerlu ataqatigiikkunartut
Angerlarsimaffinni eqqissiviilliornerit nuna tamakkerlugu 2.616-iusut Kalaallit Nunaanni politiit ukiumoortumik nalunaarusiaanni atuarneqarsinnaavoq. Tassa agguaqatigiissillugu angerlarsimaffiit ullormut arfineq-marluk politiinit siorna tamanna peqqutigalugu orninneqarsimapput.
Kinguaassiutitigut kannguttaatsuliornerit suli ajornartorsiuterujussuusut
Kinguaassiutitigut kannguttaatsuliornerit inuiaqatigiit akornanni suli ajornartorsiuterujussuupput.
Naak suliassanngortitat siorna nalunaarutigineqartut 2020-mut sanilliullugit ikileriaraluartut suli amiilaarnartumik amerlasut politimesteri Bjørn Tegner Bay oqarpoq.
- Meeqqanut kinguaassiutitigut kannguttaatsuliornerit Kalaallit Nunaanni amiilaarnaannartumik suli amerlasut inuit atugaannik misissuinerit takutippaat, Bjørn Tegner Bay oqarpoq.
AAMMA ATUARUK Naaja Nathanielsen: Meeqqanik pinngitsaaliisartut sakkortunerusumik pineqaatissinneqartariaqarput
Kinguaassiutitigut kannguttaatsuliornerit imigassartorsimatilluni pisartut taanna oqarpoq. Soorlu nakuusernerit imigassartorsimanermit aamma aallaaveqartartut.
- Nakuusernernik suliat assigalugit kinguaassiutitigut kannguttaatsuliortoqarsimatillugu suliani imigassartorsimaneq peqqutaaqataasarpoq. Amerlaqatiginngilaat, sulianili amerlasuuni meeqqanut inersimasunullu kinguaassiutitigut kannguttaatsuliortoqarsimatillugu eqqugaasoq atornerluisorluunniit imigassartorsimasarpoq, politimesteri oqarpoq.
Inuit kinguaassiutaatigut pinerlunnerit 2020-miit 2021-mut ikileriaateqalaaraluartut kisitsisit suli qaffasippallaartut Bjørn Tegner Bay isumaqarpoq. Tassami kinguaassiutitigut pinerluttut Kalallit Nunaanni nalunaarutigineqartut kunngeqarfiup sinneranut sanilliullugu arfineq-pingasoriaammik amerlanerupput.
AAMMA ATUARUK Piviusulersaarut Pilluarneq Ersigiunnaarpara nersornaaserneqartoq
Kinguaassiutitigut kannguttaatsuliornerit pillugit suliat amerlaneri politiinit iluatsittutut nalilerneqarpoq.
- Imak paasinagu pinerlunnerit taamaattut amerlisimaneri torraasutut isigigipput, naamik, kisianni tamakkua maanna unnerluutigineqartalermata. Paasinninnera naapertorlugu, paqumigiunnaariartorlugu suliassanngortitsisut amerlimmata, pinerluffigineqarsimasut pisariaqartitaminnik ikiorneqartut amerlipput.
Meeqqanut inuusuttunullu 15-it inorlugit ukiulinnut kannguttaatsuliornerit 2021-mi 249-t nalunaarutigineqarput.
