Politiit: Imigassartornerulerneq nakuusernerulernerlu ataqatigiikkunartut
Kalaallit Nunaanni nakuusersimasunik unnerluutiginnissutit ukioq kingulleq 50 procentingajannik amerlipput.
Imigassarlu eqqussaq aamma 2020-mi annerulerluni.
Imigassaq 2019-imut sanilliullugu 10,6 procentimik anginerutigisoq nunatsinnut eqqunneqarpoq nioqqutissiarineqarluniluunniit.
Taakkualu imminnut ataqatigiisinnaanerat isumaqaqqajaanarsinnaasoq, politimesteri Bjørn Tegner Bay naliliivoq.
- Imigassartorsimanermut nakuusersimanermullu suliat ataqatigiilluinnartartut politiinit misilittagarineqarpoq. Nakuusersimanermut suliat amerlanersaat imigassartorsimanermi pisarput, taamaattumillu nakuuserniartarnerit amerlineri imigassallu eqqussat annertuneruneri imminnut ataqatigiisinnaanerat isumaqaqqajaanarsinnaavoq, politimesteri Bjørn Tegner Bay oqarpoq.
Takussutissiaq: Kalaallit Nunaanni Politiit
Ukioq kingulleq nakuusersimanermut unnerluussutit 1394-iusut politiit kisitsisaatigaat.
Nangikkiartarnerit ajornartorsiutaasut
Tassa siornaamut sanilliullugit 49 procentimik qaffapput.
- Nakuusernerit amerlanersaat inuit ilisarisimasariit akornanni pilersaarutaanngitsumik tassanngaanartumillu pisarput. Angerlarsimaffinni pisarpoq, imigassartorpallaarsimanermilu pisarluni. Tassa ernguttoqartillugu pisarpoq.
- Imerniartarfiit matoreernerini angerlarsimaffimmi nanginnerit ingammik unammilligassaavoq. Taakkunani nakuusernerpassuaqartarpoq. Taamatut erngunnerni aamma pinngitsaaliinerpassuaqarpoq, Bjørn Tegner Bay oqarpoq.
Siornaamut sanilliullugu imigassaq 36.000 literinik annertuneruvoq.
Procentinngorlugu 10,6-iuvoq.
Nakuusersimanermik suliat ukiuni kingullerni pingasuni amerliartuinnarput. 2018-mi 701-iusut, ukioq kingulleq marloriaatinngorput: politiit nakuusersimanermut unnerluusanik 1394-nik ukioq kingulleq tigusaqarput.
Soormita?
Tamakku ilisimatusarfigineqarneq ajorput. Akornutaasorlu qanoq imertariaaseqarnitsinnut attuumassuteqarsimassasoq, Bjørn Tegner Bay naliliivoq.
- Imertariaaserput tunngaviulluarsinnaavoq. Nunatsinni innuttaasut ataatsimut amerlassusaat Danmarkimut sanilliukkaanni imernikinneruvugut, tamaakkaluartorli unammilligassaqartorujussuulluta.
Isumaginninnikkut ajornartosiutit aalakoornartorlu
Danmarkimut Savalimmiunullu sanilliulluta nunatsinni nakuusersimanernut unnerluusissutit amerlanerupput. Nunatsinni innuttaasut 1000-iugaangata 24,7-nik nakuusersimanermi unnerluussisoqartarpoq. Kisitsisit taakku Danmarkimi 3,5-iupput, Savalimmiunilu 1,3-iullutik.
Nalunaarnerit arfininngonermut unnuap qeqqaniit ullaakkut arfernup tungaanut amerlanerpaasarput.
Imigassamik aalakoornartortalimmik eqqussinermi kisitisaatit. Tusarfik: Kalaallit Nunaanni Naatsorsueqqissaartarfik
- Aalakoorniarluni imigassartortarnermik peqquteqarsinnaavoq. Tassa ikinngutillu eqqissilluta viinnisorujoornata erngukkaangatta ingasaasivallaartarpugut, politimesteri oqarpoq.
- Suliassaqarnerulernerput immaqa isumaginninnikkut ajornartorsiutinut attumassuteqarsinnaavoq. Kisianni tamanna sulianut ilisimasaqarnermik tunngaveqartumik isummersuutaanaammat erseqqissaassutigissavara.
- Kalaallit Nunaanni isumaginninnikkut ajornartorsiutit, imminut toquttarneq, pinngitsaaliisarneq angerlarsimaffinnilu eqqissiviilliortarneq imminut ataqatigiittut isumaqarpunga. Taakku tamarmik sunneqatigiittarput. Pinngitsaalisaanerullu kingunerisaanik eqqarsartaatsikkut ilungersuuteqaraani imaasinnaavoq imigassartornikkut tamakku puigorniarneqartartut.
Qanoq ingerlariaqqissaagut?
- Inuiaqatigiinni tamanut tamanna akisussaaffiuvoq. Politiinuinnanngitsoq. Kisianni oqartussaasut, namminersorlutik suliffeqarfiutillit, atuarfeqarfiit, peqatigiiffiit inuillu tamarmik. Ajornartorsiummut tamatta iliuuseqaqataasariaqarpugut. Kialuunniit kisimiilluni tamanna aaqqissinnaanngilaa, Bjørn Tegner Bay oqarpoq.