Piviusulersaarut Pilluarneq Ersigiunnaarpara nersornaaserneqartoq

Isiginnaagassiaq piviusulersaarut Pilluarneq Ersiunnaarpara Canadami Imagine Nativemi filmfestivalertoqarnerani nersornaaserneqarpoq. Isiginnaagassiaq Imagine Nativesimi nersornaammik ”Moon Jury”-mik taaguuteqartumik nersornaaserneqarpoq.

Isiginnaagassiami ”Pilluarneq Ersigiunnaarpara”-mi kinguaassiutitigut atornerlugaanerup kingorna inuunermik ukkatarinnippoq.

Isiginnaagassiaq piviusulersaarut Naalakkersuisut kinguaassiutitigut atornerluineq akiorniarlugu periusissiaata Killiliiisap ilagaa. Piviusulersaarummi inuit marluk – tassa Gukki Nukap Kornelia Benjaminsenillu meeraanerminni kinguaassiutitigut atornerlugaanermi kingornatigut pitsaanerusumik inuuneqalernissamut assorooruteqarnerat malinnaaffigineqarpoq, isiginnaagassiaq 2019-imi immiunneqarpoq.

- Nuannaartorujussuuvunga paasitinneqarama taamannak Pilluarneq Ersigiunnaarpara nersorniarneqarmat paasillugu tuppallernartorujussuuvoq, Nivi Pedersen KNR-imut oqarpoq. 

AAMMA ATUARUK Atornerlunneqarsimasoq: - Sunaaffa oqilisussaasimasut

Taanna piviusulersaarummik suliaqartitsiniartumit, Killiliisamit 2018-imi saaffigineqarpoq. Isiginnaagassiaq siorna immiunneqarlunilu killorneqarpoq, isiginnaagassiarlu nunatsinni siorna novemberimi isiginnaartinneqaqattaarpoq. Isiginnaagassiaq Ilulissani, Aasianni, Maniitsumi, Narsami, Tasiilami Nuummilu isiginnaartinneqarnikuuvoq.

- Isumannik tingulluarneqartorujusssuunikuuvoq, uani aamma pingaaruteqarnikuunermik Killiliisamiit ilaasoqartuaannarnissaa takutinneqaraangat, piffinni assigiinngitsuni tikitatsinni piaarersimasoqarnissaa aamma pingaaruteqarnikuungami assut, Nivi Pedersen oqarpoq.

- Ukua inuttat marluk nersorusuppakka Gukki Nuka Kornelialu assorujussuaq nersorusuppakka taammannak filmiliornermut tatiginninnerujussuungami, qujaffigerusuppakka tatingalunga taammannak oqaluttuassartatik uannut oqaluttuarsimangamik.

Nivi Pedersen Nuuk International Filmfestivalertoqarnerani septembarimi aamma Innersuarmik nersornaaserneqarpoq.