Atornerlunneqarsimasoq: - Sunaaffa oqilisussaasimasut

Kinguaassiutitigut atornerlunneqarsimanerup kingorna inuuneq pillugu filmi piviusulersaarut Katuami takuteqqaarneqartussanngorpoq. Atuagaq atornerluisaqartillugu suleriusissanut najoqqutassiaq aamma saqqummerpoq.
Piviusulersaarutip plakatitaa. Assi © : Nivaara Films
novembarip 07-at 2019 12:57

Inersimasut marluk, Gukki Nuka aamma Kornelia Benjaminsen, meeraallutik tamarmik kinguaassiutimikkut atornerlunneqarsimasut filmimi piviusulersaarummi 'Pilluarneq Ersigiunnaarpara'-mi, Katuami sisamanngornermi takuteqqaarneqartussami, peqataapput.

Filmi piviusulersaarut Naalakkersuisut kinguaassiutitigut atornerluineq akiorniarlugu periusissiaata Killiliiisap ilagaa, tassani anguniagaavoq pitsaasumik allannguuteqartoqassasoq, Kalaallillu Nunaanni kinguaassiutitigut atornerluinerit annikillissasut.

AAMMA ATUARUK Killiliisap kinguaassiutitigut atornerluisarnerit unitsissagai

Tamatumunnga atatillugu atuagaq nutaaq ullumikkut saqqummersinneqarpoq. Atuagaq, kalaallisut qallunaatullu allanneqarsimasoq, meeqqat kinguaassiutitigut atornerlunneqarsimasut pillugit suliaqartartunut najoqqutassiaavoq, kisiannili aamma taakkuninnga sullitaqanngitsunut innersuunneqarsinnaalluni.

- Angajoqqaanut, ilaquttanut assigiinngitsunullu qanoq meeqqat kinguaassiuutitigut atornerlunneqarsimanerannut tunngatillugu pitsaaliuinermik, arlaatigullu innarliisoqarsimappat sukkasuumik iliuuseqartoqarnissaanut najoqqutassiaavoq, peqqussutsimut isumaginninnermullu naalakkersuisoq, Martha Abelsen, oqarpoq.

- Taanna atoraanni nuna tamakkerlugu assigiimmik iliuuseqarnissamut, assigiimmik oqaasertalersuinissamut, assigiimmik eqqummaariffigisassanut, assigiimmillu ungasinnerusoq eqqarsaatigalugu iliuuseqarnissamut isumassarsiorfisinnaavoq, nangilluni taama oqarpoq.

Meeraallutik kinguaassiutimikkut atornerlunneqarsimasut

Piviusulersaarummi Gukki Nukap aamma Kornelia Benjaminsenip inuttut atugaasa pitsaanerusumillu inuuneqalernissaminnut assorooruteqarnerisa ataqatigiinneri paasissutissiissutigineqarput, taamaalilluni kinguaassiutitigut atornerlunneqarneq pillugu sammisaq paasiuminarsarneqarpoq tigussaasunngortinneqarlunilu.

- Kinguaassiuutitigut atornerlungaanikuuninni imminut suliarigaatsiarnikuuvunga toqqissisimasumik inoorusukkama, 24-nik ukiulik Kornelia Benjaminsen filmimi ilaatigut taama oqaluttuarpoq.

Filmi illoqarfinni ukunani takutinneqassaaq:

  • Nuuk: 7. november nal. 18:00 – 20:30 - Katuaq
  • Ilulissat: 10. november nal. 19:00 – 21:00 - Sermermiut Kulturhus
  • Aasiaat: 13. november nal. 19:00 – 21:00 - Katersortarfik
  • Maniitsoq: 17. november nal. 19:00 – 21:00 - Katersortarfik
  • Narsaq: 21. november nal. 19:00 – 21:00 - Katersortarfik
  • Tasiilaq: 25. november nal. 19:00 – 21:00 - Katersortarfik

Billetsit akeqanngillat kikkullu tamarmik soqutiginnittut tikilluaqqusaapput. Filmi meeqqanut 15-it inorlugit ukiulinnut naleqqutinngilaq, aamma meeqqat 18-it inorlugit ukiullit inersimasumik ilaqartinneqarnissaat inassutigineqarpoq.

 

Tusarfik: Namminersorlutik Oqartussat

Kornelia Benjaminsen meeraalluni kinguaassiutimigut atornerlunneqarsimasoq ulloq manna tikillugu annilaangasarnerminit aniguiniarpoq. Inuunerli atorsimasaminut utikajaarfiusoq anigorsimavaa, maannalu meeraalluni kissaatigisimasamisut kiffaanngissuseqarluni inuuneqarusunnerminik anguniaqarluni ilungersuuteqarpoq.

- Sunaaffa oqilisussaasimasut, piviulersaarummi taama oqaluttuarpoq.

AAMMA ATUARUK Udstilling: Gukki Nuka besøger Uummannaq første gang 36 år efter overgreb

Piviusulersaarummi peqataasut aappaa tassaavoq eqqumiitsuliortoq Gukki Nuka. Taanna aamma meeraalluni kinguaassiutimigut atornerlunneqartarsimavoq. Atornerluisarnerit Uummannami pisarsimapput. Illoqarfillu taanna tamatuma kingorna ukiuni 36-ni tikissimanngilaa. Kisianni filmip immiunneqarnerani tikeraarpaa.

- Misigissutsikka nammineq nalullugit, imminut paallunga, ersigalugu suut qaffakaassanersut uteqqissangaluaruma. Taamaammat ukiorpassuit uternikuunngilanga, Gukki Nuka piviusulersaarummi taama oqaluttuarpoq.

Pilluarneq Ersigiunnaarpara Trailer

 

Filmi piviusulersaarut Pitsaaliuinermut Isumaginninnermullu Aqutsisoqarfik sinnerlugu Nivaara Filmsimit suliarineqarpoq. Filmi illoqarfinni arlalinni takutinneqassaaq kingornatigut oqallitsitsinertaqartartussamik.