Tarnip qupineri Uummannami saqqummersinneqalersoq
Eqqumiitsuliortup Gukki Nukap isertukkani ukiut 30-it sinnerlugit toqqortarai, ukiullu taakkua qaangiutereersut kinguaassiuutitigut atornerlugaasimanini oqaluttuaralugu. Ukiorpassuit Uummannamiissimanngilaq, taamaattumik saqqummersitseqqaarnissani immikkuuallarinnerarpaa.
- Saqqummersitsinissaq allaninngaannit pingaarnerpaajuvoq - Uummannami peroriartorpunga sorlaqarfigalugulu, taamaattumik saqqummersitsineq innuttaasut qanoq tigussaneraat pissangassutigaara, eqqumiitsuliortoq, Gukki Nuka oqarpoq.
Inuttut atukkat artornartut
Saqqummersitsineq Gukkip kinguaassiuutitigut atornerluisarnermut atatillugu sorsunneranut aallarniutaavoq, kinguaassiuutitigummi atornerlugaanermi nalaatani anigoruminaatsoq suliarisimavaa. Aallaqaammullu eqqumiitsumiliami saqqummersinnissaat eqqarsaataasimanngikkaluarpoq.
- Ukiut 36-t Uummannamiissimananga tikippunga pingaartorsiorlunga pilliuarnermillu tunineqarpunga, inuusuttuaraallungali ilukkut ikeqarlunga Uummannaq qimappara, kisianni massakkut uterpunga nukissaqarluarlunga, kissaatigaaralu kinguaassiutitigut atornerluisarnerup akiorneqarnissaanut suleqataanissara, ajornartorsiutillu ammasumik oqaluuserineqarnissaanut neriuuteqarpunga, Gukki Nuka oqarpoq.
Saqqummersitsineq "Tarnip Qupineri" arfininngornermi ammarnersiorneqalerpat Uummannami meeqqat angerlarsimaffianni aqutsisoq, Ann Andreasen oqalugiassaaq, ammaanersiornerlu Killiliisap filmiliortuinit malinnaaffigineqassaaq.
"Tarnip Qupineri" Uummaannimi arfininngornermi apriilip ulluisa 27-anni nal. 14.00 ammarneqassaaq.
