Angerlarsimaffimmi eqqissiviilliornerit imigassamik inerteqquteqarnerup nalaani ikinnerusut
Imerniartarfinni, sutorniartarfinni, neriniartarfinnilu imigassat aqagu unnukkut unnuap-qeqqanut ammaqqissapput. Viinit simeerneqaqqissinnaalissapput imerniartarfinnilu sassaallerfigineqarsinnaalerlutit.
Kommunini pingasuni imigassamik inerteqquteqarallarneq atorunnaarsinneqalerpoq. Imigassamik inerteqquteqarneq februaarip qulingiluaanit qulinganngorpat atorunnaartussaavoq - kommunillu pingasut borgmesteriisa sivitsuinissaq kissaatiginngilaat.
Kommunip pineqartut pingasuusut tassaapput Kommuneqarfik Sermersooq, Kommune Qeqertalik aamma Kommune Kujalleq.
Angerlarsimaffimmi eqqissiviilliornerit suuppat?
Angerlarsimaffimmi eqqissiviilliortoqarnerani inuit eqqissisimanatik politiinut sianernerat.
Imaanngilaq inatsisinik unioqqutitsisoqartoq - oqqannermi inatsisinik unioqqutitsinerunngilaq.
Angerlarsimaffimmi eqqissiviilliornerit 90 procentiisa missaanni imigassartortoqarsimasarpoq.
Paasissutissarsiffik: Bjørn Tegner Bay.
Kommunip inerteqquteqarallarnissaq namminneq kissaatigisaraat - tamannalu Kalaallit Nunaanni Politiinit taperserneqarpoq. Inuimmi immiaaqqanik, viininik imigassanillu pisisinnaannginneranni angerlarsimaffimmi eqqissiviilliornerit ikinnerusartut misilittakkat takutippaat.
Politimesteri, Bjørn Tegner Bay taama oqarpoq.
Nunatsinni tamarmi angerlarsimmaffimmi eqqissiviilliornerit amerlassusaat imigassamik inerteqquteqartoqarnerani ikilipput. Siorna januaarip naanerani sapaatip akunnerata naanerani angerlarsimaffimmi eqqissiviilliornerit 51-iupput - ukioq manna 13-iupput.
Siorna februaarip aallartinnerani sapaatip akunnerani siullermi 50-iupput - ukioq manna 24-upput.
- Angerlarsimaffimmi eqqissiviilliornerit amerligaangata imaluunniit ikiligaangata angerlarsimaffimmi qanoq imigassartoqartoqarnera pillugu uagutsinnut takussutissaalluarpoq, Bjørn Tegner Bay KNR-imut oqarpoq.
Angerlarsimaffimmi eqqissiviilliornerit amerlassusaat - 2022-mi kipparissumi qaqortumiittut imigassamik inerteqquteqarup nalaaneeersuupput:
Kisitsisit qanoq ilinnut takutitsippat?
- Pisiniarfinni imigassarsisinnaanerup namminerisamillu angerlarsimaffimmi imigassamut atatillugu ajornartorsiutit akornanni ersarissumik ataqatigiittoqarpoq. Tassa inuiaqatigiinni ajornartorsiutit. Ilanngunneqanngitsoqarani: Imigassaq matuneqaraangat politiit suliassaasa amerlassusaat ikilingaatsiartarput. Ammaqqikkaangallu suliassat amerleqqittarlutik. Nakuusernermut tunngatillugu suliaq amerlanerpaartaat imigassartornermik aamma ilaqartarput.
Tassa imaappa imigassamik inerteqquteqarnerup kingornatigut saaffigiinnissutit “ikinneruppat”?
- Angerlarsimaffimmi eqqissiviilliornerit pillugit saaffiginnissutit siornamut sanilliullugit ikinnerupput. Kisianni qanorluunniit pisoqarsinnaavoq. Nunatsinni angerlarsimaffimmi eqqissiviilliornerit ukiut tamarluinnaasa amerlangaatsiartarput - ukiumut 2.500-t missaanniittarput - taakkulu amerlavallaarujussuarput.
- Maanna piffissap ilaani sisamararterutaapput imaluunniit nalinginnaasunit affaannaapput. Taakkuli ikingaatsianngillat. Inuiaqatigiinni 56.000-init innuttaasoqartumi angerlarsimaffimmi eqqissiviilliornerit sapaatip akunneranut marlunnit pingasunut amerlassuseqassagaluarput
Meeqqat ilaat eqqissisimanerusut
Taavami angerlarsimaffimmi eqqissiviilliornerit suli amerlangaatsiarpata - aammalu aallaqqaataaniiginnarnissaannut inerteqquteqarneq qanoq iluaqutaava?
- Piffissami suliassarpassuarnut angummassinnaajunnaaratarnissatsinniinnitsinni suliffeqarfiit inuiaqatigiinnut pingaaruteqartut illersorpai. Tuniluunneq annikillisimasoq peqqinnissaqarfiup oqaatigaa.
- Namminerisamik angerlarsimmaffimmi unammillernartut ikilinerat saniatigut iluaqutaasuuvoq. Saniatigulli iluaqutaasoq taanna pitsaalluinnartuuvoq. Angerlarsimaffimmi eqqissiviilliornerit, nakuusernerit, kinguaassiutitigut naapertuilluanngitsuliornerit allallu imigassamut attuumassuteqartut. Angerlarsimaffinni meeqqanut pitsaanerusoqarluni eqqissisimanerusoqarpoq, ajutoornissaraluillu pinngitsoortinneqarput.
AAMMA ATUARUK Politimesteri imigassanik matusineq pillugu: Akissarsisoqarnissaa ernummatigaarput
- Taamaammat imigassamik ammaasoqaqqippat qaffaqqissasut nalunngilara. Piffissamili sivikitsumi inuit ilaannut ikiuivugut. Piffissamili sivikitsuinnarmiuvoq - imigassamik matusigallarneq ikuallattumik qamitsineq assigaa. Taamaammat nuiaqatigiinni qanoq siunissami iliorsinnaanitsinnik silatusaaqqusivunga.
Polikeriunngilatit. Kisianni kisitsisit uku tunngavigalugit politikerinut kissaateqarsinnaaguit - qanoq kissaateqassagaluarpit?
- Maanna Imigassaq Ikiaroornartorlu pillugit Siunnersuisoqatigiinni ilaasortatut oqaaseqarpunga. Siunnersuisoqatigiit sinnernagit - kisianni ilaasortatut. Imigassartortarnermut kulturitta allanngortinnissaanut qanoq iliorsinnaanissarput tamatta oqallisigillualertariaqaripput kissaatigissagaluarpara. Inuiaqatigiit ilaanni imigassamik atuisarneq peqqinnanngilaq.
- Mianersortumik oqarneruvoq…
- Aap. Atorfilittut taamaaliussaanga. Naggaterpiaani tamanna politikkikkut akisussaaffiuvoq.
Kommunip taamaammat imigassamik inerteqquteqarnissamik piumasaqarput:
- Politiini peqqinnissaqarfimmilu januaarimi corona pissutigalugu napparsimasorpassuupput.
- Tunillatsissimasut amerlassusaat aatsaat taama amerlatigipput - tamannalu nutaamik misissueriaaseqalernermik kinguneqarpoq - tassa napparsimarululertut PCR-imik kisimik misissortissinnaalerput. Napparsimmaviimmi misissuisarfiillu misissortinniartorpassuarnut amerliartuinnartunut angummassinnaajunnaarput.
- Allat sinneri imminnut misissussapput, angerlarsimaannassapput imminnullu peqqissisutut nalunaarutigisassallutik.
- Nunatsinni tunillatsissimasut qanorpiaq amerlatiginerat tamaalilluni kisitsisaatigineqarunnaarpoq.
- Piffissami ataatsikkorsuaq napparsimasoqalinnginnissaa anguniarlugu tunillatsittut amerlassusaat piffissamut sivisunerusumut siammarternissaa anguniarneqarpoq.
- Periusissiaq politiini, napparsimmavimmi inunnillu isumaginnittuni akissarsiffiup nalaani ulaperuluttoqannginnissaanik pinaveersaartitsineq pillugu aamma atuutilersinneqarpoq.
