Politikerit spiralilersuineq pillugu: Tupannarpoq, naakkittaappoq annilaarnarlunilu
Tupannarpoq, naakkittaappoq aamma annilaarnarpoq.
Kalaallit politikeriisa spiralilersuisoqartarsimanera taama nassuiaatigaat.
Kalaallimmi niviarsiaqqat tusindilikkaat 1966-imit 1975-imut danskit oqartussaasuisa nunatsinni inuiaqatigiit amerliartornerannut annikilliiniarnerannut atatillugu spiralilersortissimanerat sammineqangaatsiarpoq.
AAMMA ATUARUK Inuit pisinnaatitaaffii pillugit siunnersuisoqatigiit: Danmarkip kalaallit inuttut pisinnaatitaaffii innarlerpai
Eqqorluarnerusumik oqaatigalugu 4500-t 1966-imit 1970-imut spiralilersissimapput. Piffissami tassani nunatsinni niviarsiaqqat arnallu kinguaassiorsinnaasut 9000-iupput.
Niviarsiaqqat arlallit spiralilersinneqarnertik naapertuilluanngitsuliorfigineqarnertut misigisimavaat, spiralilertinnerallu pinngitsaaliissutaalluni.
Oqaluttuaq taanna DR-p podcastikkut tusarnaagassiaanit "Spiralkampagnen"-imit aallaaveqarpoq.
Tusarnaagassiaq Spiralkampagnen
- Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
- 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
- "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.
Tusarfik: DR-podcast "Spiralkampagnen"
Naalakkersuisut suliamik qulaajaasoqarnissaa maanna kissaatigaat. Naligiissitaanermut naalakkersuisoq, Naaja H. Nathanielsen oqarpoq.
- Spiralilersuineq qanoq isumaqarnersoq, qanoq imaqarnersoq, tamanna niviarsiaqqanut qanoq kingunerluuteqarsimanersoq, kiap aalajangigarineraa qanorlu amerlatigisut eqqugaanerat pillugu nalunaajaasoqarnissaa piumasariniarparput. Ilisimasat taakku tamarmik saqqummersinneqassapput, Inuit Ataqatigiinnit, Naaja H. Nathanielsen oqarpoq.
Anniarneq kingunerlutsitsinerlu
Spiralilertinneq arnat ilaasa kingunerluutigalugulu spiralilersinnerup kingorna anniaateqartarsimapput. Spiraalit qangaanersut ullumikkut ilisimasanit annerupput, taakkulu arnanut ernereersimasunut naatsorsuussaallutik. Nunatsinnili niviarsiaqqat 13-init ukiullit spiralilersorneqarput.
Naleqqap siulittaasuata Hans Enoksenip spiralilersuisoqarsimanerata Inatsisartuni oqallisigineqarnissaa qinnutigaa.
- Inuit pisinnaatitaaffiinik unioqqutitsineruvoq. Danskit oqartussaasuisa nunatsinni inuiaqatigiit ikereeqisut annertusiartornerannut unitsitsiniarlutik taamaaliorsimanerat tupannarlunilu amiilaarnarpoq, taanna oqarpoq.
Spiralilersuineruvoq oqaluttuassartaa saqqummiunneqassasoq
Kalaallit politikeriisa spiralilersuisoqarsimanera pillugu suliaqartussanngornerisa saniatigut naalakkersuisoq, Naaja H. Nathanielsen kalaallinut spiralilersuinermit eqqugaasimasunut kaammattuuteqarpoq.
- Arnat oqaluttuassaminnik oqaluttuarnissaat kaammattuutigaara. Taamaammat spiralilersuisoqarneranit eqqugaasimagaanni eqqarsaraannilu tassani ilaasimalluni imaluunniit killissamik qaangiisumik nalaataqarsimagaanni nipituumik tamanna oqaatigineqarsinnaavoq, IA-mit politikeri oqarpoq.
AAMMA ATUARUK Pinngitsaaliissummik spiralilerneqarsimasoq: - Soorlu savinnik illissakkut kapoorneqarlunga
Naja Lyberthip spiralilersissimanini qanoq kingunerluutigisimanerlugu nunatsinni siulliulluni tamanut oqaluttuaraa.
- Taamani atoqateqarnikuunngisaannarlunga spiralilerneqarama anniartupilussuuvunga. Taamani putuneqarpunga. Spiralilerneqarama soorlu savinnik illissakkut kapoorneqarlunga. Tamannalu ukiorpassuarni aaqarnerluttarninnik kinguneqarpoq, Naja Lyberth 14-inik ukioqarluni spiralilersissimasoq oqarpoq.
"Paasiuminaalluinnartoq"
Inuit Ataqatigiinneersup, folketingimut ilaasortap, Aaja Chemnitz Larsenip pisortatigoortumik qulaajaasoqarnissaa eqqugaasimasullu kingunerluuteqarnerminnit tarnikkut katsorsarneqarnissaat qanoq qulakkeersinnaaneraat, danskit naalakkersuisuinut qinnutigaa.
Taassuma Folketingimi suleqataata, Aki-Matilda Høegh-Damip danskit naalagaaffiat nunatsinni inuiannik toqoraasimanerarlugu tusagassiuutinut nalunaarummi allappaa.
- Allatut oqartoqarsinnaanngilaq: Nunatsinni inuiannik toqoraasoqarnikuuvoq, Aki-Matilda Høegh-Dam oqarpoq.
Immikkulli ilisimasallit KNR-ip oqaloqatigisaasa spiralilersuineq inuiannik toqoraanertut taaneqarsinnaanngissoraat.
KNR-ip Peqqinnissamut ministereqarfik inuiannik toqoraasoqarsimasutut naliliinersoq apeqquteqarfigaa. Peqqinnisamut ministeri, Magnus Heunicke (S) akissummini ima allappoq:
- Kalaallit arnat oqaluttuarisaat attortissutigilluinnarpara. DR-ip peqqinnisaqarfimmit ajorluinnartumik periuseqartoqarsimasutut saqqummiinera ullumikkut isigalugu paasiuminaalluinnarpoq. Taamaammat ministereqarfik misissuilluaqquara.
