Ministeriuneq: Danmark Hormuzimi killilersugaanngitsumik umiartortoqarsinnaaneranut qulakkeerinneqataarusuttoq

Danmarkip ministeriunerata Mette Frederiksenip USA-p Iranillu eqqisseqatigiinnissamik pilersitseqqittussamik isumaqatigiissuteqarsinnaasimanerat nuannaarutigaa.

Taassumap uuliap akiata appariarnissaa aningaasallu naleerukkiartorunnaarnissaat qilanaaraa.

- Qaammatini pingasuni sorsunneq nunarsuarmut tamarmut sunniuteqangaartoq pissutsillu allanngorartut takusimavagut, soorluttaaq danskit nunatsinni benzinap dieselillu akitsoraluttuinnarneri malugigaat.

Ministeriunerup Danmarki umiarsuit saassunneqarnissamik aarlerinartorsiornatik Kangerliumanersuup nerukinneratigut Hormuzikkoorsinnaanissaat qulakkeerniarlugu iliuuseqarnissaminut piareersimasoq, erseqqissarpaa.

- Umiarsuarmik killilersugaanngitsumik angalasinnaanissaq ataqqineqassaaq. Tamanna nunanut tamatumunnga eqqaaniittunuinnaanngitsoq pingaaruteqarpoq, aammali nunarsuup aningaasaqarneranut nukissiuutitigullu isumannaatsuunissaanut.

- Danmarkip ilini suleqatinilu peqatigalugit Kangerliumanersuup nerukinneratigut Hormuzikkut killilersugaanngitsumik imaatigut angallannerup qulakkeernissaanut ikiuunnissaminut piareersimanini erseqqissarpaa, taanna Ritzauimut allakkatigut oqaaseqaammini oqarpoq.

Isumaqatigiissut nutaaq

Mette Frederiksen isumaqarpoq, isumaqatigiinnissamut ammaassinerit diplomatikkut aaqqiissutissanik nassaarniarnissamut, ilaatigut Iranip atomimik sakkussiaqalernissaanut periarfissiinnginnissaanut atortariaqartut.

USA-p Iranillu isumaqatigiissutaat Genèvemi Schweizimiittumi tallimanngorpat atsiorneqassaaq.

Pakistanimi ministeriuneq, Shehbaz Sharif, isumaqatigiissut sapaatiummat unnukkut nalunaarutigigamiuk taama oqarpoq.

Tamatuma kingorna ulluni 60-ini, ilaatigut atomimik sakkussiassanut tunngasut pillugit, isumaqatigiinniartoqassaaq. 

/ritzau/