Politiit ullormut nalunaarutaat: Politiit eqqissiviilliortoqarneranut orniguttariaqarsimasut
Sinerissami sumiiffinni assigiinngitsuni imigassartorsimasut ullup unnuallu kingulliup ingerlanerani eqqissiviilliortitsisimasut Kalaallit Nunaanni Politiit nalunaarutigaat.
Aasianni timigissartarfimmi sapaammi ullaakkut nalunaaqutaq qulinut qiteqquteriissimatsiaannartoq tillinniartoqarsimaneranik nalunaaruteqartoqarpoq:
- Timigissartarfimmut matu aserorneqarsimasoq nalunaarutiginnittup politiinut oqaatigaa. Tillinniartoq videot nakkutilliissutit atorlugit pasineqarpoq, suliarlu maanna paasiniaavigineqarluni, Thomas Jeppesen, Kalaallit Nunaanni Politiit pigaartuisa pisortaat KNR-imut oqarpoq.
Imigassartorsimallutillu sumiiffinni assigiinngitsuni eqqissiviilliortut orniguffigineqarsimasut, Nuummi illoqarfinnilu allani, taanna aamma oqarpoq.
Nuummi Nuussuarmi inissiat altaniisa ilaanni meeqqat ippassaq unnukkut unnuap qeqqanut qiteqqunnerata missaani pinnguartillutik annikitsumik ikuallattoqaleraluarneranik nalunaaruteqartoqarpoq, politiilli ornigummata ikuallanneq qaminneqareersimalluni.
Nuummi Radiop Qaqqaani Hotel Nordbomi najugallit ilaata iganerani uulia atorneqartoq ikuallalersimavoq, ikuallannera emhættemut siaruaassimalluni. Annikitsumik ikuallattoqarpoq:
- Ikuallanneq pujuliortitsingaatsiarsimavoq, tassanilu najugallit marluk putsumik najuussuisimanertik pillugu napparsimmaviliaanneqarput, pujuliortoqarmallu najugallit opgangimilu sanilii qimagussorneqartariaqarsimallutik, Thomas Jeppesen oqarpoq.
Ikuallattoqarnera unnuaq nalunaaqutaq marluk qaangerlugit tanneq pingasut missaanni nalunaarutigineqarpoq.
Politiit Qaqortup eqqaani annaassiniartariaqarsimasut
Umiatsiap Saga 7000-p 15-inik ilaasullip Qaqortuliartilluni motooriarsimaneranik Kalaallit Nunaanni Politiit ullaaq nalunaaqutaq arfinermut tanneq qulingiluanut nalunaarfigineqarput, politiillu taamalimmat ornigullutik.
- Umiatsiamik ingerlatsisut ikiorneqarnissaminnik nalunaaruteqarput, tamannalu pillugu politiit nammineq angallatiminnik ornigupput, ilaasullu 15-it ajunngitsut Qaqortuliaanneqarsinnaasimapput, Thomas Jeppesen oqarpoq.
Upernaviup nunaqarfiisa ilaata Nuussuup attaveqaateqannginnera taassuma saniatigut Kalaallit Nunaanni Politiit taassuma saniatigut nalunaarutigaat.
- Nuussuaq Upernaviup nunaqarfiutaa suli attaveqaateqanngilaq. Suliaq Tusassimiit ingerlanneqarpoq, nutaamillu aqagu ataasinngornermi juunip 15-ianni nalunaaruteqarumaarput.
Kalaallit Nunaanni Politiit taama nalunaaruteqarput.
