Politikerit nunamut allanngutsaaliukkamut tikeraartut
Nuna allanngutsaaliugaq pillugu aamma issittumi uumassusillit ataqatigiinnerannik erseqqinnerusumik paasisaqarnissaq tikeraarnermut siunertaavoq.
Ilisimatusartut suliffiini Zackenbergimi Daneborgimilu ilisimatuut ilaatigut Pinngortitaleriffimmeersut silap pissusaata allanngoriartornera taassumalu issittumi uumassuseqarfiit ataqatigiinnerannut sunniinera malinnaaffigaat, ilaatigullu silap pissusaata allanngornerisa nunami aammalu imaanni naasoqarnera uumasoqarneralu qanoq sunnissanerai.
Tikeraarneq pissarsiffiulluarpoq
Taamaaliornikkut ilisimatusartut suliffii taakkua marluk nunami namminermi aammalu nunani tamalaani silap pissusaanut tunngatillugu suliniarnermut ilisimasanik pingaaruteqartunik tunniussaqarput, taamatullu ilisimatusarneq ataatsimut isigalugu Kalaallit Nunaanni pinngortitamut avatangiisinullu ingerlatsivimmi aqutsinermut patajaatsumik ilisimatusarnermik tunngaveqartumik tunngavissaqarnissamik isumannaarinninnissamut iluaqutaalluni.
Qinikkat tikeraarnertik pissarsiffigilluarsimanerarpaat, pingaartumik Zackenbergimi ingerlatiinnarneqarnissaa aamma nunap allanngutsaaliukkap siunissaa pillugu sinaakkutissamik aalajangiisoqartussaammat.
Tunup Avannaani nuna allanngutsaaliugaq 1974-imi pilersinneqarpoq, 972.000 km2-inillu annertussuseqarnermigut nunarsuarmi annersaalluni. Nunami allanngutsaaliukkami nunap sannaani immikkuullarilluinnarnerani, nunami pinngortitami naleqartunik, pinngortitami pisuussutinik, itsarnitsanik eriagisassanik kiisalu aatsitassanik asseqanngitsunik assigiinngisitaartorpassuarnik peqarpoq.
