Politiit: Kommunefoged-it atugaat pitsaanerulissapput

- Kommunefogedinut akissariaritinneqartartut ullutsinnut naleqqukkunnaarsimapput. Taamaattumik kommunefoged-itut sulisunngornissaq pissaganarsarniarlugu aammalu taakku akissarsiaasa pitsaasuunissaat siunertaralugu maanna qanoq iliuuseqarniartugut, Nunatta Politimestereqarfiani allaffissornikkut pisortaaneq Claus Lyngholm Risbjerg taama oqarpoq.

Kommunefogedit politiinit oqartussaaffigineqarput atugaalli pitsanngorsarneqartarsimanngillat, naak kommuefogedit atugaat qanoq ittuusut ilisimaneqareeraluartoq. Maannali tassa pitsanngorsaaneq aallartinneqarnialerpoq:

- Politiitut sulinermi saniatigut oqartussaqarfiit arlallit, tassaasut Namminersorlutik Oqartussat aamma Kommunit Kattuffiat aamma sullittarpaat. Oqartussaqarfinnillu taakkunannga sullissineri immikkut akilerneqarneq ajortut paasinarpoq. Taamaattumik oqartussaqarfiit taakku marluk attavigaagut siunnersuutigalugu kommefogedit siunissami suliaannut naleqqunnerusumik akissarsiaqartinneqartassasut, Claus Lyngholm Risbjerg oqarpoq.

Nunatta kujaterpiaani, Tasiusami kommunfogeditut atorfilik, Karta Korneliussen qaammat kingulleq radioaviisimut oqaluttuarpoq atorfinikkamili pikkorissartinneqarsimanani, naak ukiuni tallimani kommunefogeditut atorfeqareeraluarluni.

Kommunefogedip qaammammut akileraarut peernagu akissarsiarisarpaa 533 koruunit.

- Kommunefogedit sulilersinneqarnerisa kingorna, ukiut tallimat aatsaat qaangiukkaagata pikkorissartinneqartarneri soorunami ajorpoq. Taamaattumik maanna pikkorissartitsisarnissap qitiusoqarfimmit ingerlanneqartalernissaa siunniupparput, kommunefoged siliaannut naleqqunnerusoq siunertaralugu, Claus Lyngholm Risbjerg taama oqarpoq.

Kommunefogeditut ilinniagaqalerusuttut aammalu pikkorissarnissanut aggersaasarnissat, aappaagumiit aallartissasut politiinit ilimagineqarpoq.